1986-da Moldova SSRın devlet tele-radio kompaniyasında başladı çıkmaa gagauz dilindä “Bucaan dalgasında” tele-radio kolverimneri, angılarına temel koydu hem çok yıllar sıravardı redaktor hem götürücü oldu jurnalist Todur ZANET.
Başlayıp iki aftada bir kerä 15 minutluk kolverimnerdän, redaktor hem götürücü jurnalist Todur ZANETin hem onun yanında çalışan tele-radio kompaniyasın rejisörlarının, operatorlarının hem bütün teknik personalın zaametlerinnän, “Bucaan dalgasında” tele-radio kolverimneri aftalık 45 minuda etişti hem en islää vakıtta efirä çıkmaa başladı – pazarlarda, açan hepsi siiredicilär hem sesleycilär vardı nicä aylelerinnän bilä siiretsinnär hem seslesinnär onnarı.
Eridir sölemää, ani gagauzların devletlik için çalışmalarında, bu uurda insannarın gözlerini açarak, “Bucaan dalgasında” televideniye kolverimneri en büük rolü oynadı.
Hodulluklan urgulêêrız hem açıklêêrız, ani gagauzların radiosunun hem televideniyasının (büünkü Gagauziya Radio hem Televideniye (GRT) cümne Kompaniyası) kökleri çekiler o uzak 1986-cı yıldan, “Bucaan dalgasında” tele-radio kolverimnerin efirä çıkmak başlamasından.
PATRETTÄ: “Bucaan dalgasında” studiyasında Todur ZANET hem Kazayk küüyündän Danacilar aylesi ansamblinin başı İvan DANACI.
