Paskelleyä bir afta kaldıynan Hristiannar bakêrlar klisä yortusunu – Süüt Pazarı. Bu yortu bakılêr İisus Hristozun İerusalimä büük girişi gününä.
Süüt pazarında kliselerdä büük slujbalar yapılêr. Kimi gagauz küülerdä, ölüleri anmaa deyni, klisedän sora mezarlaa gidiler da, mezarların yanında küçük ateşçik yakıp, ölülerin canı için pomana daadılêr.
Süüt pazarında klisedä süüt fışkannarını okudêrlar. Slujba bitmeyincä o süüt fışkannarına karı kulluu diimeer. Süütleri adamnar daadêr.
Okuduktan sora, fışkannarı ya evä getirerlär yada mezarlara saplêêrlar. Evä getirilän fışkanı ikonanın altına yada sayvanın saçaana koyêrlar. Süüt dalcaazını, katlayıp, feslennän bilä, ikonanın önünä koyêrlar, bir parçasını da, saalık için, suya koyêrlar da o suda yıkanêrlar.
Süüt pazarında var nicä balık imää.
Redakțiyamızdan: Büük “Süüt Pazarı” yortusunnan kutêêrız. Saalık hem uzun ömür sizä hem saaselem etişelim en Aydın hem paalı yortımıza – Paskelleya.
