Baba Marta ayın 18-dä tamamnandı 80 yıl anılmış gagauz resimcisinin, grafikacısının hem exlibrisçının, raametli Maestro Pötr Nikolaeviç VLAHın (18.03.1945 – 20.01.2012) duuma günündän. Bu günnän ilgili Komrat regional resim Galereyasında oldu “SUSAK taa dünnää kurulmasından” kanadı altında bir tombarlak masa, angısını hazırladı Gagauziya kultura Upravleniyası. Tombarlak masada pay aldılar resimcilär, incäzanaat aaraştırnacıları hem başka kultura insannarı, üüredicilär.
Açtı tombarlak masayı Gagauziya kultura Upravleniyasının başı Marina SEMÖNOVA, angısı kendi nasaatında urguladı raametli Maestro Pötr Nikolaeviç VLAHın gagauz resimcilik kulturasının kurulmasında hem ilerlemesindä paası olmayan izmetleri.
Tombarlak masada pay alannar Pötr Nikolaeviç VLAH hem onun yaratmaları için çeşitli dokladlar hem nasaarlar tuttular.
Maestro Pötr VLAHın duumasının 80-ci yıldönümü kutlama sırasında susak donaklama uurunda ustalık klası gösterildi hem Komrat Dimitriy Savastin resimci şkolasının hem dä Kongaz Süleyman Demirel Türk-Moldova teoretik lițeyin üürencileri susak rsimnerin eskizların yaptılar.
Şindi isteeriz sölemää tombarlak sofranın “SUSAK taa dünnää kurulmasından” kanadı altı için.
Maestro Pötr Nikolaeviç VLAH, yaşarkana, gagauzlara gagauz kulturasını göstermää deyni, hazırladı hem kendi YARATMAK MASRESKAYASINI SATIP, 2003-cü yılda tipardan çıkardı “SUSAK taa dünnää kurulmasından” adlı kiyadını, zerä ozaman Gagauz Kuturasını korumak hem ilerletmäk için kurulan Gagauziyada bu iş için para bulunmadı hem Gagauziyanın ozamankı Başkanı Dimitriy TABUNŞÇİK bir türlü bunda yardımcı olmadı.
Ama onbeş yıldan sora, Maestronun bu kiyadı genä basıldı – bu kerä Gagauziya Başkanı İrina VLAHın hem Gagauziya kultura Upravleniyasının başı Marina SEMÖNOVAnın zaametlerinnän “SUSAK taa dünnää kurulmasından” enidän tipardan çıktı.
Maestro Pötr Nikolaeviç VLAH aramızdan ayırıldı 2012-ci yılın Büük ayın 20-dä. Aşaada tiparlêêrız onun ölümünä gazetamızın nekrologunu.
Pötr Nikolaeviç VLAH (18.03.1945 – 20.01.2012)
Pötr Nikolaeviç VLAH aramızdan gitti yavaşıcık, birisinnän çekişmeyip, birisini gücendirmeyip, birisinä kötü laf sölämeyip, birisini azarlamayıp.
Fıkaaralık içindä, ama hodulluklan gitti.
Son yıllarıda o yaşadı sadä o pensiyacaa, ani çalışmasınnan kazandı. Kvartiracıı 15 yıldan zeedä yısıdılmazdı. Ona ekmää dä para etişmärdi. Sadä var nicä şaşmaa ona, nicä saburlan o dayanardı bu yoksullaa.
Yaratmaları için kiyadını çıkarmaa deyni, o sattı kendi yaratmak masterskayasını.
Pötr Nikolaeviç VLAH 1982-ci yıldan beeri Gagauz devletliin temelindä durardı. Herzaman büük politika aktivlii gösterärdi. Gagauz halkın herbir syezdında pay aldı.
O ilk Gagauz Bayraanın (Canavar Kafalı horozçuklan donaklı bayrak) avtorlarından birisi. O bayraa gagauzlar seftä kaldırdılar Komratta, sankţiyasız mitingta, 1989-cu yılın Canavar ayın 29-da.
Pötr Nikolaeviç VLAH duudu 1945-ci yılın Baba Marta ayın 18-dä Komratta.
1965-ci yılda başardı 1-ci Komrat şkolasını.
1969-da bitirdi “İ. Repin” adına Kişinev resimcilik uçilişçasını.
1970-cı yıldan beeri çeşitli erli hem halklararası sergilerdä pay aldı.
1977-ci yılda Sovetlär Birlii halk yaratmaları Festivalindä 1-ci erin Diplomunu hem laureat medalisini kabletti.
1980-ci yılda “İ. Födorov” adına Lyvov poligrafika institutun resimcilik-grafika bölümünü başardı.
1980-ci yılda Sovetlär Birlii hem Moldovanın resimcilär Birliin azası oldu.
1996-cı yılda kendi grafika hem exlibris resimnerin kiyadını çıkardı.
1997-ci yılda “Gagauziya kulturasına yardımcı akıntısı” derneeni kurdu.
1998-ci yılda Komrat devlet universitetında tipardan çıktı kiyat “П. Влах. Библиографический указатель”.
1999-cu yılda Komrat kasabasının şannı vatandaşı oldu.
2003-cü yılda tiparlandı Pötr VLAHın üç dilli (gagauzça, rusça, angliyca) kiyadı “SUSAK taa dünnää kurulmasından” («СУСАК с сотворения мира», “SUSAK from creatıng of the world”).
Kendi çalışmalarınnan Pötr Nikolaeviç VLAH kaldırdı gagauzların yaratmalarını dünnää uuruna.
Anılmış gagauz resimcisinin, raametli Maestro Pötr Nikolaeviç VLAHın (musulmannaa geçtiynän Ahmet İslam adını aldıydı) topracıın ilin olsun!
