Çiçek ayın (aprel) 14-dä Moldova Respublikasının Konstituțiya sudu karar aldı 1994-cü yılın Kırım ayın (dekabri) 23-dä Moldova Parlamentı tarafından kabledilän “Gagauziya (Gagauz Yeri) özel hak statusu” Zakonun Gagauziya baş prokurorunun işä alınma statyasını yok etmää.
Bu iş oldu Moldovanın gagauz olan Baş prokurorunu Aleksandr STOYANOGLUyu zakonsuz iştän atılmasından sora, Moldovanın baş prokururu koyulan İon MUTEANUnun Konstituțiya suduna bu konuda danışmasından sora.
Moldova Respublikasının Konstituțiya sudunda olan 6 daavacı, 1994-cü yılın Moldova Parlamentın deputlarının hem bütün Gagauz Halkın üzünä tükürüp, hemen karar aldı, ani “Gagauziya Halk Ropluşu tarafından Gagauziya baş prokurorluuna teklif edilän kandidat için statya” Moldova Konstituțiyasına ters gider.
Esaba alarak, ani Moldova Respublikasının Konstituțiya sudun bu kararı kesin hem matlak, var nicä, bir şüpesiz beklemää, ani arkadan, sincir gibi, “Gagauziya (Gagauz Yeri) özel hak statusu” Zakonun başka statyalarını da yok etmä işi ilerleyecek.
Gagauziya Halk Topluşu Başı yardımcısı Georgiy LEYÇU açıkladı, “gagauzların soruşunnan” ilgili toplantıya Konstituțiya suduna “Gagauziyanın temsilcilerini hiç buyur etmedilär, vermedilär kolayını makar kendi karşı argumuntlarımızı açıklayalım, zerä biz kesin diiliz kayıl baş prokurorun pozițiyasınnan”.
Georgiy LEYÇU urguladı, ani Konstituțiya sudun bu kararı “bir prețedent, ani verer kolayını
kuvettä kalmaa deyni büünkü politikalı istediklerinä görä Gagauziya zakonunu kıymaa”.
Bakalım “demokratiyalı” Evropa bu karar için ne deyecek, çünkü hererdä avtonomiyaların korunması için durmamayaca baarêr. Şindi, belliki, dilsiz gibi, susaceklar.
Bu arada, Çiçek ayın (aprel) 15-dä saat 14-00-tä Gagauziya Halk Topluşu kendisinin sıradan dışarı toplantısına toplanêr. Orada bir soruş incelenecek: “Moldova Respublikasının merkez kuvetlerin Gagauz avtonomiyasının işlemä temellerin yok edilmesi hem memlekettä cümne-politika durumunun çatlaması keezi olan adımnarın incelenmesi”.
