2025-ci yılın Kasım ayın 27-dä Moldova üüredicilik hem aaraştırma ministrusu Dan PERÇUNun (Dan Perciun) yaptı bir vizit Gagauziyanın baş kasabasına Komrada, neredä Komrat Devlet Universitetında (KDU) birkaç sıraya katıldı hem Komrat “Gavril Gaydarcı” Teoretik Lițeyi Cümne Kuruluşunda üürencilärlän hem üüredicilärlän buluştu.
Vizit zamanında Moldova üüredicilik hem aaraştırma ministrusu Dan PERÇUN, Komrat Devlet Universitetın rektoru Sergey ZAHARİYA hem iki taraftan pedagogika zaametçileri burada hem Gagauziyada gagauz hem romın dilin üürenmesinnän ilgili durumu inceledilär hem bu uurda ne yapılmasını lafettilär.
KDUnun büük zalında, 2025-ci yılın Harman ayı (avgust) – Canavar ayı (oktäbri) aylarında Gagauziyanın 51 uşak başçasından 61 gagauz dilindä üüredici-terbiedici insan için yapılan maasuz üüredicilik programasının başarılmasınnan ilgili bir kutlama sırası geçti. Sırada Moldova üüredicilik hem aaraştırma ministrusu Dan PERÇUN kutladı uşak başçalarında gagauz dilindä üüredici-terbiedicileri bu önemni işlän hem hepsinä, bu programayı başarıylan kazandıkları için, Sertifikatlar verdi. Buluşmada hem Sertifikar vermä sırasında pay aldılar Komrat Devlet Universitetın rektoru Sergey ZAHARİYA hem Gagauziya üüredicilik Upravleniyanın başı Natalya KRİSTEVA.
Bu maasuz üüredicilik programasını, “Durmamyca üüredicilik Merkezin” (Centrul de Formare Continuă) aracılıylan, ortak kurdular Moldova üüredicilik hem aaraştırma ministrlii hem Komrat Devlet Universitetı.
Hep Komrat Devlet Universitetında ministru Dan PERÇUN pay aldı “Bulgar dili hem kulturası” Merkezin hem KDUda güneş energiyası stanțiyasının ofițal açılışlarında.
KDUda güneş energiyası stanțiyası “Güneş energiyası: temelleşmiş kampus” („Energie solară: campus durabil”) proektına görä hem Polşa respublikasının pravitelstvosu, “Polşa yardımı” (“Polska Pomoc”) Fondu hem Moldovada Polşa Büükelçilii zaametlerinnän yapıldı.
Komrat “Gavril Gaydarcı” Teoretik Lițeyi Cümne Kuruluşunda Moldova üüredicilik hem aaraştırma ministrusu Dan PERÇUN yaptı bir iş buluşması üürencilärlän hem üüredicilärlän, angısında pay aldı 200 kişidän zeedä.
