Ani Gagauziyanın Başkankası üüsektän tükürer Gagauz Halk Topluşuna, nereyi o lääzım herkerä toplantılara gelsin, ama gelmeer, biliner çoktan hem GHT deputatları bununnan bilmeerlär ne yapmaa. Ani Başkanka, bulgarka olarak, gagauzlardan iiriner bunu da bileriz. Ama o bu sırada taa da beter çirkin işlär yapêr – uşakların hem başka insannarın vakıdını çalıp, onnarı gülmää alêr – bu artık heptän çirkin hem ayıp.
Çiçek ayın (aprel) 27-dä Başkankanın selfisi için Valkaneş kasabasında bir fleşmob hazırlandı – kanikullarda bulunan 500 uşaktan zeedä üürencileri kasabanın önünä çıkardılar – Başkanka İrina VLAH için Gagauziyanın Gimnasını çalsınnar deyni. Geldi burayı Başkanın Duhovoy orkestrası da, ama kendisi İrina VLAH YOKTU!
Aaç, susuz ulşaklar, asfalt üstündä, bir saattan zeedä bekledilär bir insanı – Başkankayı. Başkanka sa, bir saatan sora geldi dä, sinsor-sinsor gülümseyeräk, sansın ne suvan imiş hem ne suvana kokêr, selemnadı bu zavalıları hem KİYATTAN nesä okudu onnara. Belliki, Başkankanın dolay yanında bulunan teleoperatorlar hem fotogralar her taraftan bu “istoriyalı” işi “istoriyaya” deyni çıkardılar.
Hep ölä oldu Kiriyet küüyündä dä, neredä Dionis TANASOGLUya anmak tablasını açmak için, uykusuz hem suuktan titireyän uşaklar hem da burayı gelän insannar (hepsicii yaklaşık 100 kişi), sadece 15 minutluk țeremonțya için hem Başkankanın selfisi için onu 50 minut bekledilär. Ama, bu 15 minudun içindä hemen, türlü pozalar yapıp, kendişinin “şeremetlii hem çalışkannıı” için facebooka 31 patret koyuverdi hem, Dionis TANASOGLUnun gagauzçaya yaptıklarını sansın gülmää alarak, orayı yazıyı ROMINCA yazdı.
Bütün bu esapsızlık gösterer, ani Canabisinin Valkaneşä gelmesi diil gagauz uşaklarına hem Gagauziya Gimnasına saygı, Kiriyedä dä gelmesinin maanası uşaklara hem Dionis TANASOGLUya saygı diil, ama sadecä bu uydurma patretlär hem, GAGAUZ DİLİNİ gülmää alıp, facebookta ROMINCA haber yazmak.
Ufak bir esaba görä göreriz, ani sade iki sırada Gagauziya uşaklarından hem insannarından Başkanka İrina VLAH, en aazdan, 600 saat çaldı! Bu – 25 gün! Esapssızlaa hem gülmää almaya bakın! Diil mi çirkin hem ayıp?
Akademik hem poet Todur ZANET, Gagauz Millli Gimnanın avtoru
Foto: gagauzinfo.md saytından hem İrina Vlahın facebook sayfasından
