Kırım ayın 9-da Komrat kasabasının “Güneşçik” №4 uşak başçasında (4-cü EÜK) oldu “Gagauz imekleri” kultura sırası, angısında uşakları hem ana-bobaları tanıştırdılar gagauz halk adetlerinnän hem imäk hazırlama kulturasınnan.
“Gagauz imekleri” kultura sırası hazırlandı hem yapıldı uşak başçanın hazırlanmak grupası için hem geçirdi onu terbiedici-üürediciyka Praskovya ÇEBAN.
Bu sırada pay aldılar uşak başçanın “Kuvancık” büük grupasından uşaklar, analar-bobalar, malilär hem uşak başçanın aşçıykası.
Analar, malilär, uşaklarlan barabar, hazırladılar evdä birär gagauz milli imeyi da, getirip uşak başçasına, yaptılar onnara prezentaţiya. Uşaklar büük havezlän karşladılar o günkü musaafirlerini “Selämnêêrız hepsini” oyununnan, çaldılar türkü, annattılar peet.
“Gagauz imekleri” kultura sırasının sonunda, “Güneşçik” uşak başçasının direktoru Otiliya ALBERTÄN şükür etti terbiedici-üürediciykaya büük ustalık için hem gagauz dilin hem dä kulturanın korunmasında yaradıcılık yaklaşımı hem inițiativası için. Canabisi urguldı analar-bobaların uşak başçanın sıralarında aktiv pay almalarını, nışannayıp, ani aylenin hem uşak başçasının bölä işbirlii kurêr bütün bir üüredicilik ortamı, neredä uşak kendi köklerinä hem adetlerinä saygıylan hem uygunnuklan büüyer.
Kultura sırasında pay alan Gagauziya üüredicilik Upravleniyasının baş zaametçiykası Lidiya OSTAŞ dedi, ani “Aylä adetlerinä hem paalılıklarına dayanarak ana dilindä lafetmäk var en efektli kalup, uşaan ana ilinä meraklıını temelleştirmää deyni”.
