1 May yortusu, İş hem İlkyaz Günü hem dä Zaametçilerin halklararası daynışma Günü olarak, Gagauziya demonstrațiyalarlan, mitinglarlan hem şenniklän baktı.
Taa Gagauz devletliini kurmak günnerindän beeri görünmeyän bir insan akıntısınnan on binnärlän insan, “Barış! İş! May!” lozungun altında, demonstrațiya kolonnalarınnan sokaklara döküldülär.
Moldova hem Gagauziya bayraklarınnan hem dä türlü transporantlarlan ellerindä, insannar İşlän, Barışlan hem Dooruluklan ilgili lozunglar baarardılar.
Komratta hepsi bu kolonnalar kasabanın baş meydanına aktılar da burada konuylan ilgili bir miting oldu.
Bundan sora meydanda şenniklär başladı. Büüklär için sțenadan çaldı Moldovanın anılmış artistı İonel İSTRATİ. Uşaklara deyni dä kuruluydu türlü atrakționnar hem oyuncak erleri.
