Gagauziya Çadır primariyasının kanadı altındakı “Mirkiras” Cümne Asoțiațiyası bıldır kurduu “Oyuncak” kukla teatrusu 2025-ci yılın Çiçek ayın 28-dä uşaklara gagauzça hazırladıı “Fet-Frumos hem padişahın kızı” kukla spektaklisini gösterdi.
“Fet-Frumos hem padişahın kızı” kukla spektaklisinin prezentațiyası oldu Çadırdakı Mihail ÇAKİR adına lițeyin aktoviy zalında, neredä toplandı lițeyin küçük klaslarından üürencilär.
Spektaklinin gözäl yapılı hem donaklı kuklalarını pek becerikli oynattılar hem seslendirdilär: Mihail KONSTANTİNOV (Fet-Frumos hem Evrem), Andrey REDJEPOV (Padişah hem Dev adamı), Nataliya İVANÇUK (Padişahın kızı) hem Nataliya MANASTIRLI (Kara garga hem Yaban guguşu).
Maasuz “Oyuncak” kukla teatrusu için “Fet-Frumos hem padişahın kızı” yazdı gagauz dramaturgu Todur ZANET. Muzıkayı yazdı kompozitor Födor GAYDARCI. Spektaklinin rejisöru – Mihail KONSTANTİNOV.
“Oyuncak” kukla teatrusunun gagauz dilindä spektaklilär proektına, Çadır primariyasınnan iş birliindä, arka oldu Moldovada işbirliindä Şveyțariya bürosu (Swiss Cooperation in Moldova).
“Oyuncak” kukla teatrusunun premyerası oldu 2024-cü yılın Kasım ayın 27-dä, açan o seftä gösterdi Todur ZANETin yazdıı “Rız otu” kukla spektaklisini.
