Çiçek ayın (aprel) 24-26 günnerindä Türkiye kultura ministerlii, TİKA, Yunus Emre institutu, Egipet bilim Akademiyası kanatları altında Egipetın Aleksandriya kasabasında geçti IX. Halklararası Soțial Bilimnär Kongresi (INCSOS-25), angısı yapıldı TBBB (Türkiye Parlamentı) 29-cu dönem Başkanı Prof. Dr. Mustafa ŞENTOP’un onur başkannıında, Türkiye Sakarya Uygulamalı Bilimnär Universitetı (SUBÜ), Turkish Studies işbirlii hem Arab Academy for Science Technology and Maritime Transport Universitetın (Arab Bilim Tehnologiya hem Deniz Taşımalıcıı Akademiyası Universitetı) (AASTMT) ev saabiliindä.
Kongresin açılışı sırasında TBBB (Türkiye Parlamentı) 29-cu dönem Başkanı Prof. Dr. Mustafa ŞENTOP, AASTMT üürenci işleri Başkan yardımcısı Prof. Dr. Alaa A. ABDEL BARY, Türkiyenin eski üüredicilik ministrusu Prof. Dr. Mahmut ÖZER hem başkaları pay aldılar.
Kongresä kabledilän bilim adamnarın 290 dokladın arasında vardı Akademik Todur ZANETin ““Büük Gagauzça-Rusça Sözlük” – Gagauzluu, Gagauz kulturasını, Folklorunu hem Dilini koruyan hem onnarın derinniini ortaya koyan bir kultura hazinesi” adlı dokladı da, angısını Canabisi Kongresä katılannarın önündä okudu.
Ayrıca Akademik Todur ZANET baaşladı Prof. Dr. Mustafa ŞENTOPa TİKA yardımınnan kendisinin hazırladıı 6 tomnuk “Büük Gagauzça-Rusça Sözlük” takımını hem “Gagauzların kayıp olan dilinin hem kultura adetlerinin Moldovada korunması” adlı 3 tomnuk bilim kiyatlarını.
Kongres sırasında katılımcılar için büük bir kultura programası da yapıldı. Aleksandriya gezisi programasında vardı: Egipet devletinin antikadan çekilän anılmış Aleksandriya bibliotekasınnan tanışmak, antika zamanın 7 büülü paalılıından biri olan hem günümüzä etişmeyän Aleksandriya deniz Feneri erindä kurulan geç Memlük yaratmalarından Kayıtbay Kale gezisi, Memlüklär hem Osmannı zamanı camilärlän Ebü’l Abbas Camii hem Osmannı gubernatorun Sarayınnan tanışmak gezisi.
Kayır gezilerindä dä: antika zamanın 7 büülü paalılıından biri olan Giza piramidaları (Heops, Hefren hem Mikerenos) hem Sfinks görülmesi, Papirus merkezinin gezilmesi, Egipetın Milli muzeyinnän tanışmak hem orada Ramzes, Tutanham, Nefertitti gibi faraonnarın mumiyalarını bakmak.
Bundan kaarä, katılımcılara deyni, Nil derä gezisi yapıldı hem Kayır Kalesinnän, camilerinnän hem çarşısınnan tanışmak kolaylıı da verildi.
