2025-ci yılın Kırım ayın (dekabri) 23-dä Gagauziyada baktılar avtonomiyanın kurulmasının 31-ci yıldönümünü. Bu gün 1994-ci yılın Kırım ayın (dekabri) 23-dä, Moldova Parlamentın tarafından “Gagauziya (Gagauz Yeri) özel hak statusu için” Zakonun kabledilmesindän sayılêr, angısına görä Gagauziya (Gagauz Yeri)Avtonom Teretorial Bölgesi kuruldu. Bu Zakonnan Moldova tanıdı gagauz milletinin milli kendibaşına olmasını hem Moldova Respublikası içindä devletlik kurmasını.
Gagauziyada avtonomiyanın 31-ci yıl kutlaması başladı Gagauziyanın “Şan Aleyası”na çiçek koymasından, sora da ilerledi Komrat Kultura evindä olan yortulu toplantıylan.
Bu yortulu toplantıda pay aldılar Gagauziya Halk Topluşun deputatları hem Gagauziya İspolkomu azaları, Gagauziyayı kuran veterannar hem aktivistlär, Türkiye Respublikasının Büükelçiliin birinci sekretari hem diplomatiya misiyanın başının ilk yardımcısı Gözde DİLEKTAŞLI, Türkiye Respublikasının Komrat Başkonsulu Eda GÜÇ, Moldova Parlamentın eski başı Dimitriy DYAKOV, Moldovada Rusiya Büükelçiliin sovetnii Ayrat ABDULİN, popazlar, primarlar hem sıradan insannar.
Yortulu toplantı Moldova hem Gagauziya Gimnaların çalmasından başladı. Sora kutlama sözlerini tuttular Gagauziya Halk Topluşun geçici Başı Nikolay ORMANCI hem Gagauziya İspolkomu Predsedatelin yardımcısı İlya UZUN, angısı okudu Gagauziya Başkankasının Evgeniya GUȚULun advokatlarından yollanılan kutlama mesajını. Bir kutlamaylan danıştı Gagauziya halkına Türkiye Respublikasının Komrat Başkonsulu Eda GÜÇ. Kutlama sözlerini söledilär bu toplantının başka musaafirleri dä.
Toplantı başarıldı Gagauziyanın artistlerinin büük bir konțertinnän.
