2024-cü yılın Kırım ayın 23-dä Gagauziya avtonomiyasının kurulmasının 30-cu yıldönümünü kutlanıldı. Gagauziya avtonomiyası çekiler ozamandan, açan 1994-cü yılın Kırım ayın (dekabri) 23-dä Moldova Parlamentı “Gagauziya (Gagauz Yeri) özel hak statusu” Zakonu kabletti da gagauzlar hem Gagauziya topraklarında yaşayan başka milletlär avtonomiyalarına kauştular.
Gagauziya (Gagauz Yeri) avtonomiyası kurulmasının 30-cu yıldönümünü kutlamaları başladı Gagauzların Şan Aleyasına çiçek koyulmasınnan. Çiçek koyannarın arasında vardılar gagauz devletlii kurucu veterannar, Gagauziya Başkankası Evgeniya GUȚUL, Gagauziya Halk Topluşun (GHT) Başı Dimitriy KONSTANTİNOV, Türkiye Respublikasının Komrat Başkonsulu Adnan HAYAL, Türkiye Respublikasının Kişinev Büükelçiliin diplomatları, TİKA Kişinev ofisin koordinatoru Tarık METE, Moldova parlamentın hem GHT deputatları, Gagauziya İspolkomun azaları, popazlar hem başka paalı musaafirlär.
Şan Aleyasına çiçek koymaktan sora, hepsi insannar geçtilär Komrat Kultura evinä, neredä onnarı Başkanın duhovoy orkestrası karşladı hem avtonomiyamızın 30-cu yıldönümü kutlamsının yortulu sırası geçti.
Yortu açıldı Moldova Respublikasının hem Gagauziyanın Gimnalarının cannı çalmasınnan. Nedän sora da, zalda bulunan Gagauziyanın popazları “Çok yıllara” duayı çaldılar.
Yortulu sırada nasaatları açtı Gagauziya Halk Topluşun Başı Dimitriy KONSTANTİNOV, angısı, başta pek gözäl bir gagauzçada lafedip, sora da rusçaya geçti. Canabisi başardı sözünü bölä: “Gagauz Yeri – ileri!”
Sțenaya çıkan Gagauziya Başkankası Evgeniya GUȚUL, hem gagauzça hem dä rusça nasaat ederäk, kutladı insannarı Gagauziya avtonomiyasının kurulmasının 30-cu yıldönümünnän, urgulayıp, ani Gagauziya lääzım işbirliini taa çok Rusiya Federațiyasınnan hem Türkiye Respublikasınnan pek derin tutsun.
Sțena arkasında gerili olan bir büük ekrandan, zalda bulunan insannara hem bütün Gagauziyaya, bir videoylan danıştı Gagauziyayı kurucu veterannarından birisi, Gagauz Respublikasının Üüsek Sovetin predsedateli Mihail KENDİGELÄN.
Bu nasaatlardan hem danışmadan sora, kendi kutlama sözlerini açıklasınnar deyni, sțenaya sıravardı buyur edildilär: 2001-2009 yıllarda Moldova Prezidentı Vladimir VORONON, Türkiye Respublikasının Komrat Başkonsulu Adnan HAYAL, 2006-2015 yıllarda Gagauziya Başkanı Mihail FORMUZAL hem 2015-2023 yıllarda Gagauziya Başkankası İrina VLAH.
Konuşma nasaatlarından sora, Gagauziya Başkankası Evgeniya GUȚUL ödülledi o insannarı, kim kendi izmetinnän gagauz devletliin hem Gagauziya (Gagauz Yeri) avtonomiyasının kurulması için çalıştı hem şindi dä çalışêr. O insannara, kimä ordennar, kimä şannı adlar hem hepsinä “Gagauziya (Gagauz Yeri) – 30!” medalisi verildi.
Kutlama yortunun sırası ilerledi bir konțertlan, angısı açıldı Gagauziyanın ofițial olmayan “Yaşa, Halkım!” gimnasınnan (laflar – Todur ZANET, muzıka – İlya FİLEV).
