2024-cü yılın Kırım ayın (dekabri) 24-dä Gagauziya Halk Topluşun (GHT) Başı Dimitriy KONSTANTİNOV yaptı bir brifing, angısında Canabisi açıkladı, ani “Moldova güvennik hem informaţiya slujbasının (SİS) zaametçileri ona memlekettän çıkmaa izin vermedilär” – https://halktoplushu.md/archives/16270.
Dimitriy KONSTANTİNOVa görä, bu iş oldu 2024-cü yılın Kırım ayın (dekabri) 23-dä avşamsı, açan o, Gagauziya (Gagauz Yeri) avtonomiyasının 30-cu yıldönümünü kutlamasından sora, neredä Canabisi kritika yaptı Moldovanın büünkü kuvetlerinä da geldi Kişinev aeroportuna, Türk Hava Yolların (THY) eroplannarınnan Tayland devletinä uçmaa hem orada kendi aylesinnän Eni Yılını karşlamaa deyni.
GHT Başı söledi, ani THY reysına registrațiya yaptıktan sora, kendisini Moldova güvennik hem informaţiya slujbasının (SİS) zaametçileri oyalamışlar da, “terbiyetmää başlayıp”, sölemişlär, ani “devlet maşınasınnan şaka oynamaa” – bu bir kuşkulu iş. Hem onun Moldova kuvetlerinä yapılan kritikası devletin güvenniinä kuşkuludur hem o var nicä pek serioz sonuçlarlan karşılaşsın”. SİS zaametçileri bildirmişlär, ani o “bu işlerdän vazgeçmäzsä, var nicä “pek kötü erlerä varsın”.
THY eraplanı uçtuktan sora, Dimitriy KONSTANTİNOVu boşta brakmışlar da aeroport dışına geçirmişlär.
Gagauziya Halk Topluşun Başı açıkladı, ani danışmış Amerika Birleşik Devletlerin hem Evropa Birliin Moldovada Büükelçiliklerinä, teklif edip onnara, cuvap versinnär hem açıklasınnar “nesoy demokratiyayı, laf hem raat gezi serbestliini biz aarêêrız”.
Brifing açıklamasının konusunu toparlayarak, Dimitriy KONSTANTİNOV dedi: “Fikir plüralizmasına izin vermeerlär. Kuvettä bulunannarın sölediklerinä karşı çıkarsanız, nicä görersiniz, onnar söleerlär, ani var nicä başka erlerä düşäsiniz. Görüner, ani biz kırmızı çiziyä yaklaşêrız”.
