2016-cı yılın Orak ayın 15-dä gecesi olan Türkiyedä devlet devrimi denemesinä karşı koyan kahramannarın öldürülmesinin hem yaralamasının acısını Türk halkınnan paylaşmak için bu pazar, Orak ayın 15-dä, Komratta hem Çadırda acılı sıralar geçti.
Çadırda, primariyanın kararınnan, kuruldu hem açıldı bir anma taşı, angısında yazılı 248 Türk vatandaşının adı, angıları, cannarını kurban koyup, o gecä karşı çıktılar devrimcilerä hem onnarın tanklarına.
Bu taşın açılmasının mitinginda pay aldılar Gagauziya Başkanın hem İspolkom predsedatelin 1-ci yardımcısı Vadim ÇEBAN, Gagauziya Halk Topluşu Başı Vladimir KISSA, TİKA Kişinev ofisin koordinatorun yardımcısı Mert BARIŞ, Çadır hem Komrat primarları Anatoliy TOPAL hem Sergey ANASTASOV, Gagauziyanın dış ilişkilär Upravleniyanın başı Vitaliy VLAH, Çadır rayonun administraţiya başı Valentin KARA, Türkiye vatandaşları, çadırlılar hem komratlılar.
Saygı duruşundan sora söz tuttular Vadim ÇEBAN hem Anatoliy TOPAL. Anmak taşın açılışnda taşa karanfil çiçää koyuldu hem gökä 251 karmızı hem da biyaz şişiriga kolverildi (herbir raametli olan kahramannarın canına).
Komratta anma mitigında da kardaşlıklan dostluk konuşmaları hem gösterilmesi oldu. Burada söz tuttular Vadim ÇEBAN hem Sergey ANASTASOV hem genä gökä 251 karmızı hem da biyaz şişiriga kolverildi.
