Baba Marta ayın 17-dä Gagauziya Halk Topluşun sıradan dışarı toplantısında karar alındı GHTya eni seçimneri 2026-cı yılın Kirez ayın 21-dä yapmaa.
Ama esaba alarak, ani Kişinev, maamilä surat seçimnär lääzımmış olsunnar Moldovanın eni kabledilän Seçim kodeksına görä, Gagauziya Halk Topluşuna seçimneri uurunda her türlü köstek koyêr.
Taa 2022-ci yılda, bu Seçim kodeksı kablediinän, GHT deputatları urguladılar, ani onun kabledilmesi Gagauziya (Gagauz Yeri) avtonomiyasının yok edilmesinä de-yüre yolunu açtı. Bir dä Seçim kodeksın 51 oylan kabledilmesi Konstituțiyalı “Gagauziya (Gagauz Yeri) özel hak statusu” Zakonuna karşı diiştirmeklär yapmak için 61 oy lääzım (MR Konstituțiyasının 111-ci statyasının 7-ci punktu).
Ozamannar, bu işlän ilgili olarak yardım için, GHT deputatları 02.12.2026 günündä danıştılar Moldova Prezidentına, OBSEya, Evropa Sovetinä hem Moldovada bulunan halklararası hem diplomatiya misiyalarına açık danışma yaptılar. Ama hepsi bu erlär yaptılar kendilerini sansın “ne suan imişlär, ne dä suana kokêrlar” gibi da bir cuvap vermedilär.
GHT deputatları, İspolkom azaları, sıradan insannar hem cümne kuruluşlar açıktan urgulêêrlar, ani büünkü gündä Moldovanın merkez kuvetleri Gagauziyaya karşı benzerisi olmayan bir baskı uyguladılar hem, Gagauziya avtonom-teretorial bölgesinin özel hak statusunu yok etmä deyni, ellerindän gelän herbir işi yapêrlar. GHT deputatları yardım için genä halklararası kuruluşlara – OBSEya hem Evropa Birliinä – ofițial yazılarlan danıştılar. Şindilik genä bir cuvap yok.
Gagauziya sa sade bir iş isteer: Gagauziyada Halk Topluşuna seçimneri Moldova konstituțiyasına hem “Gagauziya (Gagauz Yeri) özel hak statusu” Zakonuna uygun olarak, Gagauziya kurallarına görä, açıktan, dooru hem zakonnu bir uurda yapmılsınnar hem dä onnara Moldova merkez kuvetleri türlü uydurma baskılarlan karışmasınnar. Başka türlü 2026-cı yılın Kirez ayın 21-dä Gagauziyada Halk Topluşuna seçimnerin olması büük bir şüpä altında.
