Canavar ayın (oktäbri) 6-10 günnerindä Kırgızistan respublikasının baş kasabasında Bişkekta geçti gençlär arasında sambo güreşindä dünnää çempionatı. Bu çempionatta pay aldılar 28 devlettän 400 sambocudan zeedä gençlär.
Gençlär arasında sambo güreşindä bu dünnää çempionatında pay aldı Moldova Respublikasının 9 kişidän oluşan sambo komandası da, angısında vardılar Gagauziyadan sambocular – Aleksandr NEDU, Valentin ÇELENGİR hem Darya VLAH.
Çempionatın 59 kg aarlık kategoriyasında güreşän Darya VLAH aldı bu çempionatın gümüş medalisini, taradap finalda Rusiyanın sambistkasına. Final yılunda bizim sambistkamız biri-biri ardı ensedi İordaniyadan, Kırgızistanda hem İzraildän güreşçiykaları.
İkinci sambocumuz sa, Aleksandr NEDU, 79 kg aarlık kategoriyasında, çempionatının bronzasını kazandı. O medali için güreştä Aleksandr NEDU becerdi ensemää Uzbekistan sportsmenını.
Gagauziyanın sambocularını bu çempionata hem bu başarılara hazırladılar onnarın trenerları Pötr KURU hem Sergey KURU. Kutluza olsun!
