Çeviz ayın (sentäbri) 1-dä, taman eni üürenmäk yılın çeketmesindä hem bilgilär Günündä Türkiye Respublikası Gagauziyanın Kırlannar (Kotovskoe) küüyün İlya SINKU gimnaziyasının hepsi üürenicilerinä hem üüredicilerinä büük baaşışlar getirildi – 90 planşet hem 17 noutbuk.
Bu baaşışları vermäk sırasında Türkiye Respublikasının Kişinev Büükelçisi Gürol SÖKMENSÜER söledi, ani “Baaşışları Türkiye halkın adından Gagauziyaya getirdi Türkiye Respublikasının dışişleri Bakanı Mevlüt ÇAVUŞOĞLU, angısı Moldovada hem Gagauziyada ofițial vizitlan bulundu Harman ayın 26-27 günneri arasında”. Canabisi urguladı, ani pek seviner, “ki bu baaşışlar etişti zoru olan hem ana yollardan uzakta kalan küüyün gimnaziyasına hem o verecek kolayını bu pandemiya vakıdında uşaklar üürenmäk proțesından kopmasınnar”.
Gagauziya Başkanı İrina VLAH kendi nasaatında şükür etti Türkiye kardaşlarımıza bu hem taa ileri yapılan büük yardımnar için hem urguladı, ani ilk kerä olêr ölä ki bir üüredicilik kuruluşun hepsi üürencilerinä hem hepsi üüredicilerinä hepsinä birdän bölä baaşışlar yapılêr. Başkanın bu sözlerindän sora, gimnaziyanın aulu içindä toplu hepsi üürencilär sevinmäklän baardılar hem Gagauziyanın, Moldovanın hem Türkiyenin bayraklarını sallamaa başladılar.
Gagauziya üüredicilik Upravleniyası Başı yardımcısı Anna RUSSU şükür etti Türkiyeyä hem TİKAya, ani her kerä yardım ederlär Gagauziyanın üüredicilik kuruluşlarına, ne verer kolayını üüretmäk sistemasını kaavileştirmää.
İlya SINKU gimnaziyasının direktoru Georgiy Stepanoviç ÇEBANOV, kolektivın hem üürencilerin adından şükür etti Türkiyeyä hem Türkiye Büükelçisinä bu paalı baaşışlar için.
Ofițial nasaatlardan sora, paalı musaafirlerä deyni gimnaziyanın üürencileri peet okudular hem çaldılar türküyü “Yaşa, Halkım!” (laflar – Todur ZANET, muzıka – İlya FİLEV).
Baaşışları vermäk sırasında taa pay aldılar Türk İşbirlii hem Koordinaţiya Agenstvosu Başkannıın (TİKA) Kişinev programaların Koordinatoru Selda ÖZDENOĞLU, Türkiye Respublikasının Komrat Başkonsulu Hasan AKDOĞAN hem, belliki, Kırlannar (Kotovskoe) küüyün gimnaziyasının bütün kolektivı hem üürenciler.
