Çeviz ayın (sentäbri) 1-dä, Gagauziya İspolkomun büük başında Türkiye Respublikasının Kişinev Büükelçisi Gürol SÖKMENSÜER verdi Gagauziya bolnițalarına medițina ekipirovkası yardımı: 20 bin medițina maskası, 1200 medițina halatı hem 300 koruyucu tulum (kombinizon) hem koruyucu ekrannar.
Yardımı vermäk sırasında Büükelçi Gürol SÖKMENSÜER söledi, ani bu yardımı, Harman ayın 26-27 günneri Moldovaya hem Gagauziyaya ofițial vizitında, Türkiye halkın adından, getirdi Türkiye Respublikasının dışişleri Bakanı Mevlüt ÇAVUŞOĞLU.
Yardımı vereräk Büükelçi Gürol SÖKMENSÜER urguladı, ani “Pandemiya belasında Türkiye Respublikası her zaman yardımda bulundu hem Moldovaya, hem da Moldovanın bir payı olan Gagauziyaya”.
Kendi tarafından Gagauziya Başkanı İrina VLAH, Gagauziyanın saalıı koruma Upravleniyasının Başı Svetlana DULEVA hem sırada bulunan medițina zaametçileri şükür ettilär Türkiyeyä bu paalı yardım için.
