Otuz yıl geçti, nicä Moldovanın ilk Prezidentı Mirça SNEGUR hem Türkiyenin 9-cu Prezidentı Süleyman DEMİREL Komratta, Çadır yolun saa tarafında, tula fabrikasının temelinä ilk taşı koydular. Bu fabrika ortak Türkiye hem Gagauziya bir fabrikası olaceydı. Ama olmadı.
Bilersiniz mi neçin olmadı? Ozamankı Moldova kuvetleri, nice şindikilär dä, istemäzdilär, ani Gagauziya ekonomika tarafından kaavi hem baamsız olsun. Bu üzerä dä, politika gösterileri yaparak, arkadan urdular. Hem nicä urdular!
Ozamannar Moldovada bir yalancı premyer-ministru vardı da, maamilä surat, o günnerdä Moldovanın “Prut deresenin taşmasından zarar görän insannara yardım etmäk” sebepinnän fabrikanın düzülmesi için kurulan Moldo-Türk ortak firmasının parasına el koyup, o paraları “yardıma” aldı. Hem Moldovanın ilk Prezidentı, hem da o premyer-ministrusu o parayı çevermää söz verdilär hem bu iş için garantiyalı yazı verdilär. Ama yalancı çıktılar hem parayı çevirmedilär.
Bu beterä dä, tula hem keremet yapmak için 100 yıllık toprak rezervası olan, Moldo-Türk tula fabrikası Komratta yapılmadı. Salt temeli koyuldu, angısı büün da, üüsüz olarak, Komrat kenarında, Çadır yolun saa tarafında, durêr (bak fotoyu). Ama bu iş durgunduynan, Moldova premyer-ministrusunun ozamankı bir bulgar yardımcısı hemen bulgar kasabacıında Tvardițada bu türlü bir fabrika kurdu. Ozamannar Komratta Moldo-Türk tula fabrikasının aslıya çıkmaması – bu bir saklı plandı mı? Osa yanılêrız mı?
