Ceviz ayın (sentäbri) 3-dä Moldova klisesi yaptı kanonizaţiya din adamına, mitropolita Gavriil BÊNULESKU-BODONİya (Grigorie Bănulescu-Bodoni, 1746 – 11.04.1821). Kanonizaţiya sırası hem liturgiya oldu Moldovanın Kapriyanı manastırında, neredä bulunêr Gavriil BÊNULESKU-BODONİn mezarı.
Kanonizaţiya yapıldı allahlı liturgiya zamanında. Liturgiya Moldova Mitropolitı VLADİMİRın öndercilii altında geçti.
Taa ileri, 2016-cı yılın Harman ayın (avgust) günnerdä, Moldova Mitropolitı VLADİMİR, açtırdı Gavriil BÊNULESKU-BODONİn mezarını da oradan kemikleri üzä çıkardı. O kemikleri enidän sandaa koydular da, kanonizaţiyadan sora, manastırda erleştirdilär.
Mitropolit Gavriil BÊNULESKU-BODONİnin kanonizaţiyası için karar alındı Rusiyanın hristian Klisesinin Sinodunun kayıllıından 10 gündän sora. Kararı Moldova Mitropoliyası aldı.
Not. Mitropolit Gavriil BÊNULESKU-BODONİ duudu 1746-cı yılda Bistriţa kasabsında (Transilvaniya). Oldu Konstantinopol Patriarhatının, sora da Rusiya Klisesinin episkopu. 1793-cü yılın Hederlez ayın (may) 10-dan beeri Ekaterinoslavskiy hem Hersono-Tavriçeskiy mitropolitı. 1801-ci yılın Çiçek ayın (aprel) 7-dä Ay Sinod azası oldu. 1812-1821 yıllarında, kendisinin son gününädän, Kişinev hem Hotin mitropolitı. 1821-ci yılın Çiçek ayın (aprel) 11-dä raametli oldu. Gavriil BÊNULESKU-BODONİ Kapriyanı manastırında gömülü.
