Ceviz ayın (sentäbri) 6-da Kişinevda, Moldova öndercilerinä karşı, protest mitingları çekettilär. En büük protest mitingını başlattı cümne kuruluşu “Platforma Civică Demnitate şi Adevăr (DA)”. Bu Platforma meydana çıkarttı onnarca bin insan.
“Platforma Civică Demnitate şi Adevăr (DA)” açıkladı, ani bu miting diilmiş, ama “Marea Adunare Naţională” (Büük Milli Toplantısı) toplantısıymış. Onuştan Platforma sayêr, ani onnar bütün Moldova vatandaşların adından protest ederlär.
Mitingçılar, “Devleti geeri isteeriz” hem “Miliardı geeri çevirin” baarıp, durmamayca Moldova öndercilerinä karşı lozunglar baardılar. Açıkladılar, ani oligarh sistemasını kuvettän atmaa, ani Moldova Prezidentı Nikolae TİMOFTİ işindän atılsın, ani Vladimir Plahotnüku (Dempartiyanın başkanı) esaba çekmää, pravitelstvoyu diiştirmää, eni seçimnerä gitmää.
Bundan kaarä Platforma istedi, ani insannarın karşısına çıksınnar Moldova Prezidentı Nikolae TİMOFTİ, Parlamentın Predsedateli Andrian KANDU hem Premyer-ministru Valeriy STRELEŢ. Onnarın üçündän mitingçıların temsilcilerinnän buluştu sadä Valeriy STRELEŢ.
Bunu esaba alarak, mitingçılar ayırdılar “Büük Milli Toplantısının Konsiliumunu” (orayı girdilär o kişilär kim insannarı meydana çıkardı) hem mitingın rezolüţiyasını kablettilär, angısında açıkladılar kendi istediklerini: Moldova Prezidentı Nikolae TİMOFTİ işindän atılsın, Vladimir Plahotnüku esaba çekmää hem çalınan 1 miliard doları geeri çevirsinnär h.t.b.
Mitingçılar açıkladılar, ani kalêrlar Kişinevun “Marea Adunare Naţională” meydanında onnarın istediklerini öndercilär esaba almayınca. Da, kurup çadırları, meydanda erleştilär.
Not. Bakmadaan ona, ani mitingçıların bir lozungu “Devleti geeri isteeriz” diildi belli angı devleti: Moldovayı mı Romıniyayı mı? Çünkü mitingta bu iki devletin bayrakları dalgalanardı hem Romıniyaylan birleşmäk plakatları vardı. Bundan kaarä nasaat edennerin çoyunun sözlerindä dä bu fikir ortaya atılırdı.
