Harman ayın 31-dä Moldova Respublikasında bakıldı Romın Dili Günü, angısının temeli koyuldu 1989-cu yılın Harman ayın (avgust) 31-dä, açan Moldova Sovet Soțialist Respublikasının Üüsek Soveti romın dilini ofițial devlet dili olarak tanıdı hem moldovan dilinin latin alfavitına geçmesi için zakonu kabletti.
Romın Dili Günündä Moldova Prezidentı Maya SANDU aarladı Kişinevda Romınıya Prezidentını Nikuşor DANı (rom. Nicușor Daniel Dan) da bu yortuya adanmış sıralarda onunnan bilä pay aldı.
Kutlama sıralarında iki prezident büük romın poetın Mihay EMİNESKUnun byustuna çiçek koydular, Kişinevun Büük Milli Toplantısı Meydanında olan “III-cü Büük Milli Diktantı”n açılış nasaatlarını yaptılar hem yortuylan ilgili konțertä katıldılar.
1990-cı yılın Kirez ayın (iyün) 23-dä Moldova Parlamentı bildirdi, ani Harman ayın (avgust) 31-ri artık “Limba noastră cea română” (“Bizim romın dilimizin Günü”) yortusu olarak bakılacek.
Bu yortunun adı 1994-cu yılda diişti da Moldova Konstituțiyasının 13-cü statyasında erleştirildi eni ad – “Bizim dilimiz”.
2023-cü yılın Baba Marta ayın 2-dä Moldova Parlamentı genä diiştirdi bu yortunun adını, yapıp onu ölä nicä Romınıyada – “Romın dili”, hem, sıradakı bir zakonu 58 oylan kabledip, Moldovanın Konstituțiyasını diiştirdi (Moldova Konstituțiyasında diiştirmä yapmaa deyni lääzım en azdan 67 oy). Bu sıradan zakona görä 2023-cü yılın Baba Marta ayın 16-da, Moldova Konstituțiyasında diiştirmä yapıldı da oradan “moldovan dili” yazısını kaldırıp, erinä “romın dili” yazısı koyuldu.
