2014-cü yılı Çiçek ayın 29-da biz tiparladıydık yazıyı “Komisiya angı yımırtayı yımırtlayacek: biyazı mı, karayı mı?” (bak: http://anasozu.com/komisiya-angi-yimirtayi-yimirtlayacek-biyazi-mi-karayi-mi/), neredä Moldova hem Gagauziya arasında kurulan parlament komisiyası (çalışmak grupası) çalışmasını inceledik. Bu çalışmanın sonunda, 2014-cü yılın Orak ayın (iyül) 18-dä, Moldova Parlamentının tarafından ilk okumakta kabledildi “Kimi zakonnara diiştirilmäk hem enilenmäk yapmak zakon proektı”. Bu proekt Gagauz cümnesinin arasında hem Gagauziya Halk Topluşunda kara yımırta olarak kabledildi. Bununnan ilgili Gagauziya Halk Topluşu ozaman bir Açıklama da (rus dilindä) kablettiydi (bak: http://anasozu.com/parlament-komisiyasi-calismak-grupasi-kara-yimirtayi-yimirtladi/).
Bakmadaan ona, ani Moldovanın öndericileri adadılar, ki parlamentta ortak çalışmak grupasının (burayı Halk Topluşu deputatları da girer) Moldovanın “Kimi zakonnara diiştirilmäk hem enilenmäk yapmak zakon proektına” Gagauziyaynın bütün teklifleri esaba alınacek bu iş, nicä da herkerä bir kof hem kara yımırta çıktı.
Üç yıllık ortak çalışmalar, afedin, bir erä sıbıdıldı. 2017-ci yılın Kirez ayın (iyün) 2-dä bu proektlar Parlamenta çıkarıldı. Ama, maamilä surat, Moldova Parlamentın juridika komisiyasından geçmedileri için, kabledilmedilär. Da te Kirez ayın 7-dä Moldova Parlamentın juridika komisiyası Zakon tekliflerini tuz-buz yaptı – tekliflerdän bişey brakmadı. Taa bir kerä gösterip, ani gagauzların teklifleri hiç birinin umurunda da diil. Hem, ani Komisiyanın çalışması – vakıdı uzatmak bir oyundu.
Parlament komisiyası bir kara yımırta yımırtlayıp, gagauzları taa bir kerä gülmää aldı hem bizim erimizi taa bir kerä gösterdi. Deputatlarımız da bunu yuttular.
