Gagauziyada Moldova pravitelstvosunun kanțeläriya bürosunun başı Sergey ÇERNEV yaptı bir açıklama, angısına görä Gagauziya Halk Topluşun sıradan dışarı toplantısında GHTya eni seçimneri yapılması için kararını suda verecek.
Moldova pravitelstvosunun kanțeläriya bürosunun başı Sergey ÇERNEV açıklamasında söledi, ani “GHT Kararında seçim yapan kuruluşun adı “Gagauziyanın Merkez seçim komisiyası” olarak gösterili, ama Moldovanın eni kabledilän Seçim kodeksına görä, o lääzım olsun “Gagauziyanın Merkez seçim soveti”.
Bir yıl geeri, 2025-ci yılın Küçük ayın (fevral) 20-dä, Valkaneş primariyasında Moldova premyer-ministrusunnan olan toplantıda zakonsuzluk yapıp Gagauziya bayraanı salondan dışarı atan (bak: https://anasozu.com/gagauziya-bayraana-saygisizlik-kavgasi/) hem 2025-ci yılın Kasım ayın 12-dä “Büün Gagauziya – bu Moldovanın baamsızlıına hem güvenniinä yaanan bir separatist bölgesi” deyän Sergey ÇERNEV 2026-cı yılın Baba Marta ayın 16-da urguladı, ani “Devlet kanțeläriyanın uuru – Gagauziya topraklarında zakona uymak”.
