Hederlez ayın 15-dä sabaalendän Moldovada Türkiye Respublikasının Kişinev Büükelçiliindä Türkiyenin Manisa bölgesinin Soma rayonunda kömür şahtasında olan tragediyanın kurbannarını anmak için bir yaslı toplantı oldu.
Yaslı toplantıya katıldılar Türkiye Respublikasının Kişinev Büükelçiliin hem Kilinev TİKA koordinatorluun zaametçileri, Moldovada Azerbaycan Büükelçisi hem zaametçileri, türk hem azerbaycan işadamnarı, “Ana Sözü” gazetasının baş redaktoru, din adamnarı.
Yas toplantısında acı bir nasaatlan Türkiye Respublikasının Kişinev Büükelçi Mehmet Selim KARTAL söz tuttu. Sora toplantıda bulunannar bir minutluk susmaklan andılar hepsini kim canını kaybetti bu büük tragediyada.
Not. Türkiyenin Manisa bölgesinin Soma rayonunda kömür şahtasında olan tragediyaylan ilgili Türkiye Respublikasında Hederlez ayın 13-dän beeri üç günnük milli yas tutulmasınnan Türkiye Respublikasının Kişinev Büükelçiliindä bir yas tefteri açıldı. Kendi acızgannıını bildirmäk isteyennär, Türkiye Respublikasının Kişinev Büükelçiliinä gidip, yas tefterindä yazılarını brakabilirlär.
Anaktar sözlär : Manisa, Soma, T.C. Kişinev Büyükelçiliği, Türkiye
