Türkiye Respublikasının Manisa bölgesinin Soma rayonunda kömür şahtasında olan tragediyaylan ilgili, orada cannarını kaybedän insannarı anmak için hem o raametlilerin aylelerinä acızgannıımızı bildireräk, Gagauziyanın Çadır kasabasında Hederlez ayın (may) 16-da yas günü tutulêr.
Bu iş için karar aldı Çadır kasabasının primarı Georgiy ORMANCI. Ayrıca bu tragediyaylan ilgili kendi acızgannıını Canabisi bildirdi Türkiye Respublikasının Kişinev Büükelçisinä Mehmet Selim KARTALa hem çadırdakı “Orizont” moldo-türk liţeyin öndercilerinä.
Yas günündä devlet kuruluşların binalarında Moldovanın hem Gagauziyanın bayrakları, yas simvolu olarak, biraz aşaa indirildi.
Saat 11-30-da Çadırda, hepsini kim Somadakı büük tragediyada canını kaybetti, bir minutluk susmaklan andılar.
Foto – Anadolu Ajansı
