Çiçek ayın (aprel) 2-dä, Moldovaya ofiţial vizitlan bulundu Türkiye Respublikasının dışişleri Bakanı sayın Mevlüt ÇAVUŞOĞLU. Canabisinin vizit programasına görä günün ilk payında buluşmaklar Kişinevda oldu, ikinci payında da – Komratta. Vizit programasına katıldılar Moldovada Türkiye Büükelçisi Mehmet Selim KARTAL, Türkiyedä Moldova Büükelçisi İgor BOLBOCEANU, TİKA delegaţiyasının başı Mahmut ÇEVİK.
İlk buluşma
Protokola görä Türkiye dışişleri Bakanı Mevlüt ÇAVUŞOĞLUnun ilk buluşması Moldova dışişleri hem Evropaya intergraţiya ministrusunnan Natalia GERMANnan oldu. Buluşmada taraflar urguladılar, ani iki devlet arasında ilişkilär pek üüsek uurda bulunêrlar hem açıkladılar, ani ileri dooru da karşılıklı politika dialogu, alış-veriş hem ekonomika işbirlii sade kaavileşecek. İki taraf annaştı, ani en kısa zamanda Moldova hem Türkiye arasında Strategiyalı ortaklıı Deklaraţiyası imzalanacek, angısı çift ortaklıında hem işbirliindä eni bir basamak açacek.
Natalia GERMAN urguladı, ani Moldova için “pek önemli malların eksportunu zeedeletmää hem milli ekonomikaya türk investiţiyalarını çekmää” hem teklif etti erli energetika proektlarını incelemää.
Kendi tarafından Mevlüt ÇAVUŞOĞLU açıkladı, an yakın vakıtta Türkiye parlamentı Moldova Türkiye arasında serbest alış-veriş Annaşmasına ratifikaţiya yapacek, ne, belliki, iki devlet arasında ekonmika ilişkilerini eni uura kaldıracek.
Buluşmada urgulandı, ani Moldova hem Türkiye arasında vizaların kaldırılması verdi kolayını, ani insannar taa sık hem raat iki devletä gidip gelsinnär.
Buluşmanın sonunda Natalia GERMAN hem Mevlüt ÇAVUŞOĞLU imzaladılar Moldova hem Türkiye pravitelstvoların arasında işbirlii Protokolu, angısına görä belli ediler TİKA yolunnan Moldovaya yapılan ekonomika, alış-veriş, infrastruktura, tehnologiya, juridika, devlet öndercilii, üüredicilik, kultura hem saalıı korumak uurunda ilerlemäk için teknik yardımnarın vakıdı hem durumu.
Natalia GERMAN urguladı, ani Moldova hepsini yapêr, ani burada yaşayan gagauzlara kolaylık olsun kendi kulturasını, adetlerini hem dilini üürenmää hem korumaa deyni.
İkinci buluşma
Türkiye dışişleri Bakanı Mevlüt ÇAVUŞOĞLUnun Moldova Prezidentı Nikolae TİMOFTİylän buluşmada iki devlet arasında politika, ekonomika, kultura, cümne hem strategiyalı işbirlii soruşlarından kaarä, derindän incelendi Moldovanın Evropa yolunda gitmesi da.
Bakan Mevlüt ÇAVUŞOĞLU urguladı, ani Türkiye da bu yolda bulunêr hem Moldovaya bu uurda kendi yardım omuzunu da koymaa hazır.
Buluşmada Moldovanın gagauz vatandaşlarınnan soruşları da ortaya koyuldu. Onnara cuvap verereräk, prezident Nikolae TİMOFTİ dedi, ani “Moldova Respublikasının cümnesindä herbir kolaylık yapılêr gagauzlar kendiliini korusunnar deyni hem kendi kulturalarını hem dillerini Evropa normalarına görä ilerletsinär deyni”.
Buluşmada Nikolae TİMOFTİ hem Mevlüt ÇAVUŞOĞLU inceledilär Moldova Respublikasının energetika uurunda korunmasını hem Kara deniz işbirliinnän ilgili soruşları.
Üçüncü buluşmak
Üçüncü buluşmak Moldova Premyer-ministrusu Kiril GABURİCİlän oldu. Premyer-ministrusu Kiril GABURİCİ buluşmada urguladı, ani Türkiye Respublikası Moldova için en önemli ortaklardan birisidir. Bunu gösterer o, ani Moldovanın ekonomika hem alış-veriş partnörların listesindä Türkiye edinci eri kaplêêr.
Türkiye dışişleri Bakanı Mevlüt ÇAVUŞOĞLUnun Moldova Premyer-ministrusu Kiril GABURİCİlän buluşmasında, başka soruşlardan kaarä, ön verildi o proektların incelemesinä, angılar büün Moldova hem Gagauziya için can düülmesi gibi önemli. Söz gider “infrastrukturaların enilinmesindä ortak proektların yapılması için hem insannarın yaşamak uurlarının zenginnetmesi için”.
Kiril GABURİCİ urguladı, ani bu günü Moldova dışişleri hem Evropaya intergraţiya ministerliindä imzalanan Moldova hem Türkiye pravitelstvoların arasında işbirlii Protokolu Moldova için pek önemni bir Protokoldur.
Buluşmanın sonunda Moldova Premyer-ministrusu Kiril GABURİCİ teklif etti Türkiye Prezidentın Recep Tayyip ERDOĞAN hem Başbakanı Ahmet DAVUTOĞLU bu yıl, uygun zamanda, Moldovaya ofiţial bir vizit yapsınnar.
Not. Buluşmaklarda Moldova dışişleri hem Evropaya intergraţiya ministrusunnan Natalia GERMANnan, Moldova Prezidentı Nikolae TİMOFTİylän hem Moldova Premyer-ministrusu Kiril GABURİCİlän bütün ürektän şükür edildi o yardımnar için, ani Türkiye Respublikası TİKAnın (Türk İşbirlii hem Koordinaţiya Agenstvosu) programalarına görä Moldovaya yapêr.
Gagauziyaya vizit
Üülendän sora Türkiye dışişleri Bakanı Mevlüt ÇAVUŞOĞLU hem Moldova dışişleri hem Evropaya intergraţiya ministrusu Natalia GERMAN Gagauziyeya bir vizit yapatılar.
Delegaţiyayı Gagauziyada, Başkannık hem Halk Topluşu bibasının önündä, tuz ekmeklän karşladılar Gagauziyanın eni Başkanı İrina VLAH, eski başkan Mihail FORMUZAL hem Gagauziya Halk Topluşun başı Dimitriy KONSTANTİNOV. Sora üüsek musaafirlerä deyni Beşalma küüyündän “Karanfil” ansamblisi gagauz halk oyunnarını gösterdi.
Ofiţial karşılamaktan sora, ofiţial buluşmaklar oldu. İlkin Halk Topluşun toplantı salonunda Türkiyedän delegaţiya buluştu Gagauziyanın öndercilerinnän. Nedän sora, presanın önündä, Türkiye dışişleri Bakanı Mevlüt ÇAVUŞOĞLUya “Gagauziya avtonomiyasına 20 yıl” medalisi hem gagauz milli kilimi baaşlandı. Baaşışları kablederäk Bakan Mevlüt ÇAVUŞOĞLU şükür etti Gagauziyaya hem gagauz halkına hem urguladı, ani “Bu yıllarda Türkiye hem Moldova arasında pek islää işbirlii hem dostluk kuruldu hem avtonomiyanın kurulması günündän beeri Türkiye Gagauziyanın yanında bulundu”.
Bakan Mevlüt ÇAVUŞOĞLUnun göz-gözä bir buluşması oldu Gagauziyanın eni Başkanınnan İrina VLAHlan. Presa için bu kapalı buluşmadan sora İrina VLAH açıkladı, ani “buluşmada kaldırılmış soruşların arasında va Valkaneş su proektı, Gagauziyada gagauz dilindä eni uşak başçanın kurulması”. İrina VLAH dedi: “Biz göreriz, ani Türkiye vardı, var hem var olacek bizim ortaamız hem Kişinevlan Komrat arasında işbirliin kurulmasında köprümüz”.
Ayırı bir vizit oldu Komrat “Atatürk” bibliotekasına. Bibliotekalylan kısadan tanışmaktan sora, sayın Mevlüt ÇAVUŞOĞLU burada bir buluşma yaptı Moldova Parlamentın deputatınnan Nikolay DUDOGLUylan. Buluşmadan sora “Atatürk” bibliotekasının direktoru Vasilisa TANASOGLU baaşladı Türkiye dışişleri Bakanına Mevlüt ÇAVUŞOĞLUya, gagauzları taa derindän annamak için, Todur ZANETin kiyadını “GAGAUZLUK: Kultura, Ruh, Adetlär”.
“Recep Tayyip ERDOĞAN” adına ihtärlar evin ofiţial açılışı
Gagauziyaya vizit programasının büük bir payı ayırıldı Komratta “Recep Tayyip ERDOĞAN” adına ihtärlar evin ofiţial açılışına. Türkiye, TİKA yolu yardımınnan, bu ihtärlar evin enilenmesini hem tertiplemesini yaptı.
İhtärlar evindä üüzek musaafirleri tuz-ekmeklän hem gagauz halk oyunnarınnan karşladılar. Karşlamaktan sora, Recep Tayyip ERDOĞAN” adına ihtärlar evin ofiţial açılışı yapıldı. Açılış şiridini birliktä kestilär Türkiye dışişleri Bakanı Mevlüt ÇAVUŞOĞLU, Moldova dışişleri hem Evropaya intergraţiya ministrusu Natalia GERMAN, TİKA delegaţiyasının başı Mahmut ÇEVİK, Gagauziya Halk Topluşun başı Dimitriy KONSTANTİNOV, Moldova Parlamentın deputatı Nikolay DUDOGLU hem Komrat kasaba Sovetin başı Viktor VOLKOV. Nedän sora üüsek musaafirlär ihtärlar evin içinnän, kuhnesinnän, odalarınnan hem insannarınnan tanıştılar. Türkiyenin hem Moldovanın dışişleri bakannarı ihtärlar evindä bulunan insannara baaşışlar verdilär, onnarlan sözä durdular hem presaya açıklamalar yaptılar.
Todur ZANET
Materialın hazırlanmasında kullanıldı Moldova prezidentın, pravitelstvosunun hem Moldova dışişleri hem Evropaya intergraţiya ministretliin presaya açıklamaları da.
Anaktar sözlär : Gagauziya, İrina VLAH, Mevlüt ÇAVUŞOĞLU
