Kongaz küüyün Todur Zanet adına teoretik lițeyindä Türk İşbirlii hem Koordinaţiya Agenstvosu Başkannıı (TİKA) fizika, himiya hem biologiya Tehnoklas inovațiya klasların kurulmasının proektını başardıı gibi, ardından bu lițeyin temelindä Gagauziya şkolaların menecerları hem pedagogları için yapıldı “Üüredicilik proțeslarını kullanmakta efektli yaklaşımnar” uurunda bir metodologiya praktikum seminarı.
Metodologiya praktikum seminarın baş teması oldu “Üüredicilik proțesların monitoringı: bu günkü tehnologiyalar hem yaklaşım çözümneri”. Bu seminar birleştirdi bütün avtonomiyanın şkola menecerlarını hem pedagoglarını da verdi kolayını burada onnar kendi ustalıkları uurunda dialog kursunnar, işlerinä analiz yapsinnar hem kendilerinin üüredicilik proțeslarını kullanmakta yaklaşım çözümnerinän karşılıklı paylaşsınnar.
Ev saabiykası olarak, seminarı açtı Todur Zanet adına teoretik lițeyin direktoru Mariya ÇEBANOVA. Metodologiya praktikum seminarında pay aldı hem ona katılannarın önündä nasaat etti Gagauziya üüredicilik Upravleniyanın başı Natalya KRİSTEVA.
Seminarın teoriya payından sora, şkola menecerları katıldılar seminarın praktika payına – Todur Zanet adına teoretik lițeyin üüredicileri tarafından hazırlanan hem verilän açık uroklara.
Nedän sora da, geçip, bu lițeydä Türk İşbirlii hem Koordinaţiya Agenstvosu Başkannıı (TİKA) tarafından başa çıkarılan fizika, himiya hem biologiya Tehnoklas inovațiya klasların kurulması proektınnan eni açılan klaslara, seminarda pay alannar dialog, kantarlama, analiz hem praktika incelemelerindä işlerini ilerlettilär.
Lițeyin o günkü musaafirlerinin kolayı oldu yakından tanışmaa bu eni açılan klaslarlan. Onnar urguladılar, ani burada herbir iş düşünülmüş: kullanışlı tertiplerdän, ani vererlär kolayını pedagoglar urokları efektli götürsünnär, taa üürencilerin oturmak erlerinä kadar, ani verer kolayını aktiv katılmaa üürenmäk proțesına.
