2024-ci yılın Kırım ayın (dekabri) 20 sabaası Komrat kasabasının merkezindä, Gagauziyanın Başkannık hem Halk Topluşu binasının yanında, Komrat Kultura evinin hem “Gavril Gaydarcı” teoretik lițeyin önündä duman içindän işidildi sirenaları uultusu hem tütün şaşkaların patladılması.
Sölemää, ani “Gavril Gaydarcı” teoretik lițeyin üürencileri şkola çanın erinä bu sirenaları uultusunu hem tütün şaşkaların patladılmasını işidip, korktu – bu bişey sölämemää. Çünkü gün-gündän Moldovada cenk çeketmesi korkusunu büüklerin hem uşakların imiklerinä sokêrlar.
Bu uultulardan hem patlamaklardan sora, duman içindän peydalandılar “Fulger” speţnaz poliţiya Birliin maşinalarını hem polițiyacıları, angıları kaskalarlan hem maskalarlandı, bronejeletlara giimniydi hem avtomatlarlan ellerindä nesa yapardılar.
Moldova Respublikasının içişleri ministerliin polițiyasının Baş inspektoratı bildirdi, ani “Komratta olay – bu “taktikalı üürenmekleri”, angıları öncedän hazırlanmak plannarına koyulmuştu”.
Bu zor inandırêr, çünkü patlamaklar (bak fotoyu) oldular Komrat Kultura evin önündä, orada, neredä 2024-cü yılın Kırım ayın (dekabri) 23-dä Gagauziya (Gagauz Yeri) avtonomiyasının 30-cu yıldönümünü kutlayamaları toplantısı yapılsın lääzım hem neredä 2025-ci yılın Küçük ayın 15-dä “Gagauziyanın hepsi uurlarda deputatların Kongresi”n toplanması düşünüler.
Esaba olarak, ani birkki vakıtlar Moldova “basın alayında” durmamyca Gagauziyanın yok edilmesi için yazêrlar hem türlü ksenofobiya açıklamakları yapılêr, bu “taktikalı üürenmekleri” hiç masal gelmeerlär.
Komratta bulunan Fulger” speţnaz poliţiya Birliin diil seftä Gagauziyanın kilit binalarının önündä “denemeklär” yapêr (bak: https://anasozu.com/fulger-spetnaz-politiyasi-komratta-parmak-sallamak-mi-korkutmak-mi-gagauziyayi-enmak-mi/).
Şindi Moldovanın “Fulger” speţnaz poliţiyası, Komratta kuvet göstermesinnän, acaba neyä hazırlanêr: 2024-cü yılın Kırım ayın 23-nä mi, 2025-ci yılın Küçük ayın 15-nä mi?
Moldova içişleri Ministerliin “Fulger” speţnaz poliţiya Birlii kuruldu 1991-ci yılda, Moldova içindä barışı hem raatlıı korumaa deyni. Raatlık bölä mi, korkutmaylan mı, korunêr acaba?