Çiçek ayın (aprel) 16-da biz artık yazdık, ani Valkaneş kasabasından Gagauziya Halk Topluşu (GHT) deputatı Sergey ÇERNEY, Gagauziya İspolkomunun COVİD-19 salgınına karşı koymak için 34 milion 929 bin 910 leylik para harcamaa neeti için yapılan smeta hakkında bir televideniya kanalında şaşılacek hem şoklu açıklama yaptı.
Kendi açıklamasında Sergey ÇERNEY söledi, ani ona görä bu smeta 3-5 katına şişirmä bir smeta, nereyä koyulmuş harcamalar, angılarının çoyu Gagauziyaya bu durumda hiç diil lääzım da.
Örnek olarak Sergey ÇERNEY açıkladı bu smetanın kimi detallerini, angılarına görä, deycez “doktorlara ekrannar”ın birisi Moldovada 55 ley yapêr, bu smetada – 155 ley istener; ak ceerleri havalandırma aparatlar Türkiyedä 3 bin ABD doları yapêr, bu smetada – 20 bin Evro koyulu.
Redakțiyamızın elinä geçti Gagauziya Başkanı İrina VLAHın Gagauziya Halk Topluşuna bu konuylan ilgili kiyadı hem smeta detalleri, neredä Canabisi teklif eder GHT kabletsin COVİD-19 salgınına karşı koymak için 34 milion 929 bin 910 leylik smetayı.
