2013-cü yıldan beeri Gagauziyanın Aydar küüyündä “Gagauz kilimneri” festivali yapılmaa başladı. Altı yıl sıravarda bu festival Aydar küüyün Kurban günündä hem Büük Panaiya (Harman ayın (avgust) 28-zi, bu gündä Aydar küüyün Kisä Kurbanı) yortusunda ya ona karşı yapıldı. Ama bıldır bu adeti bozmaa başladılar…
Bıldır “Gagauz kilimneri” festivali, Gagauziya Başkanın harțaklıına görä, Harman ayın (avgust) 18-dä yaptılar (bak: http://anasozu.com/ko-baarliim-gagauz-kilimneri-festivalinda-gagauzluktan-makarki-bisey-bozulmdik-kalsin/). Şindi sa Aydar küüyün adetini heptän bozdular da festivali bir uydurma gündä (Harman ayın (avgust) 9-da) onlain yaptılar. Bu gün Aydar küüyün Kurban gününä hem Büük Panaiya yortusuna pek uzakta kaldı.
Onlain yapmasının sebepini annêêrız – koronavirus. Ama günün diiştirmesi – hiç bişeyä uymêêr!
Ne düşer “Gagauz Kilimneri” festivalin onlain yapılması için sölemää, lääzım doorudan metetmää onu hazırlayannarı, zerä bir tepä zaamet koymuşlar aydarlılar, Gagauziya muzeylerin hem Gagauziyanın kultura Upravleniyasının işçileri, artistlär.
Festivalin onlain kutlamasında gösterildi kilimcilik hem kilimcilär için videoroliklär, çalındı türkülär hem oyun oynandı.
“Gagauz Kilimneri” festivalinnän ilgili olarak insannara danıştılar Aydar küüyün primarı İlya KÖSÄ, Gagauziya Başkanı İrina VLAH, Moldova üüredicilik, kultura hem aaraştırma ministerliin şindiki ministrusu İgor ŞAROV hem eski ministru Monika BABUK, Gagauziyanın kultura Upravleniyanın başı Marina SEMENOVA.
