Hederlez ayın 8-dä Kongazın Varvara Topal adına gimnaziyasında oldu gagauz evelki oyunnarınnan ilgili hazırlanmış olan “Evelki oyunnar” gösterisi, ani adandıydı burada kurulan “Kongaz korafları” şkola muzeyinin eni erä taşınması hem orada erleşmesi sırasınnan.
“Evelki oyunnar” gösterisini, kendi üürediciykasının Pelagiya Andreevna KOVRİKOVAnın hem ona yardımcı olan Olga Georgiyevna KAPAKLInın zaametlerinnän, hazırladılar Varvara Topal adına gimnaziyanın 3-cü klaslarda üürencileri. Başlayıp bilmecelerä hem bulmacalara cuvap vermektän, uşaklar gösterdilär dedelerimizin kalma oyunnarı: “Çıkar kalpaa”, “Beşka”, “Bız”, “Kız gelin alarız”, “Kukla uyutmak”, “Kuran” hem “Uzun eşek”.
Bundan kaarä, bu sıraya maasuz buyur edilän insan, Yana bulü TARALEŞ, gösterdi hem üüretti uşakları nicä iplän “Düzen” oyununu oynamaa. “Beşka” oyununun da gösterdi bir üürencinin anası – İvanna BORLAK. Taa bir ana, Polina UZUN kendi oolunnan “Kuran” oyununu oynadı.
Kongazın Varvara Topal adına gimnaziyasında “Kongaz korafları” şkola muzeyinin yortusuna hem “Evelki oyunnar” gösterisinä, şannı musaafir olarak, buyur edildilär Akademik Todur ZANET, küüyün primarı Mihail ESİR, Gagauziya Radio hem Televideniye (GRT) cümne Kompaniyasının jurnalisti Polina BARBOVA, gimnaziyanın büünkü direktoru Mariya Stepanovna ARNAUT, gimnaziyanın eski direktoru hem bu muzeyin kurulmasının fikir saabiykası Olga Petrovna ÇEBANOVA, gimnaziyanın muzıkada üüredicisi Mihail PAÇİ hem Kongaz Kongaz Nikolay Çebanov adına gimnaziyasının küçük klaslarda üürediciykası Matröna Dimitrievna KÖR.
Bu gözäl gösteridä nasaat edennär Akademik Todur ZANET hem küüyün primarı Mihail ESİR kutladılar gimnaziyayı hem üüredicilärlän üürencileri bu gözäl hem kıvrak sıraylan hem da baaşladılar enidän açılan muzeyä kendi baaşışlarını, verip onnarı muzeyin başına Mariya Matveevna GROZDEVAya.
Kaldı urgulamaa, ani “Kongaz korafları” şkola muzeyindä büünkü gündä bulunêr 500-zä yakın eksponat, ama, nicä açıkladı gimnaziyanın direktoru Mariya Stepanovna ARNAUT: “Şkolaya may hergün uşaklar eski işleri getirerlär da, umudumuz var, ani muzeyimizdä bu eksponatların sayısını bir binädän zeedeletmää”.
