Nicä sızdırıldı Moldova kapancılık milli Administrațiyasından, Harman ayın 4-dä Gagauziya Başkankasının Evgeniya GUȚUL Kişinevun №13 kapanından, “cezasını çekmäk için”, Moldovanın karılar için tek kapanı olan hem Hınçeşti rayonunda bulunan “Ruska” adlı № 7 karılar kapanına atıldı. Taa ileri, onunnan hep “bir iş için” kapana atılan Svetlana POPAN da, Orak ayın 22-dä burayı getirildi.
Bakmadaan, ani Gagauziya Başkankasının Evgeniya GUȚULun ceza kararı kuvedä geçmedi, çünkü Canabilerin advokatları 2026-cı yılın Orak ayın 27-dä danıştılar Moldovanın Üüsek daavacılık Palatasına, ki Kişinev Apeläțiya Palatasının 2026-cı yılın Hederlez ayın 28-dä Evgeniya GUȚULun hem Svetlana POPANın hakında I-ci daavacılık kararını diiştirilmedik brakmakta Kararını temizlemäk için. Da büünkü günädän Moldovanın Üüsek daavacılık Palatası bu konuda olumnu ya da olumsuz bir karar açıklamadı. Bu üzerä dä bu insannarın “cezalarını çekmäk için” kapana atılması da taa kuvedä geçmedi.
Nicä dä olsa, bir yıldan zeedä kapanda kapalı duran iki küçük uşak anası olan Gagauziya Başkankasının Evgeniya GUȚUL “Ruska” adlı № 7 karılar kapanına kapadıldı. Oradan gelän haberlerä görä Canabisi tek kişilik bir kamerada bulunêr.
