Büük ayın 20-dä, Ay İvan günündä, komratlılar kendi klisesinin Kurban gününü bakıtılar. İoan Vatizedici klisesinin 176-cı ayozlu yortusunu kutlamaa deyni, Komrada geldilär Kişinev hem bütün Moldova mitropolitı Vladimir, Komrat hem Kaul episkopu Anatoliy, Êlistin hem Kalmıţk episkopu Yustinian.
Mitropolitı hem episkopları, ayırı-ayırı, tuz-ekmeklän hem çiçeklärlan karşladılar Komrat primarı Nikolay DUDOGLU, Komrat klisenin popazı İulian hem Gagauziyanın baş popazı Pötr.
Komratlılarlan bilä bu yortuyu kutlamaa deyni kliseyä geldilär Gagauziyanın başkanı, GHTnın başı, Gagauziya İspolkomun azaları hem Halk Topluşun deputatları, Moldova parlamentının deputatları, kultura hem cümne insannarı.
Kutlamalar yortulu ayozlu slujbayalan (Allahlı liturgiyaylan) başladılar. Liturgiyayı yaptılar Kişinev hem bütün Moldova mitropolitı Vladimir, başta olarak, ona yardımcı oldular episkoplar Anatoliy hem Yustinian hem kliselerin popazları.
Slujbanın sonunda vladıka Vladimir okudu akafist (metedän din türküsü) Ayozlu Vatizedici İoana.
Slujbadan sora, mitropolit Vladimirın emirinä görä, klisä nagradaları verildi. Nagradaları kabledennerin arasında vardılar jurnalistlär da. Klisenin “Enseyeci Georgiy” ordennarı verildi GRT predsedatelinä Anna HARLAMENKOya hem GRT zaametçisinä Vitaliy D. GAYDARCIya. Kutlêêrız!
