(Mihail ÇAKİR pedagogika kolecında 10-cu Master-klas)
Poeziya, nicä muzıka insanın canına danışêr, üreeni dalgalandırêr. Poeziya – ses hem duygu büülenmesi, üüsek simfoniya dalgasında can açıklaması, duygu dünnesi, neredä üüsek laflar yaşêêr da candan cana geçer. Peet yazması – Allahtan vergi. Da, eer o sana veriliysä, onu lääzım dooru, becerekli kullanmaa, çok çalışmaa, ki bu ustalık uurunda becermeklerin hem ustalıın açılsın, ilerlesin.
Artık beş yıl sıravardı Komrat Mihail ÇAKİR pedagogika kolecında üürenicilerin poeziya uurunda ilk adımnarında, peet yazmasında yardımnar için Master-klas yapılêr. O master-klaslarda üürencilerä yardımnarı verer anılmış gagauz poetı, akademik Todur ZANET. Canabisinin zaametinnän üürenicilerimizin da yaradıcılıı hem ustalıı ilerleer.
Master-klaslarda Poet gösterer örnek, enikunu doorudêr genç poetları, üüreder onnarı görmää yannışlıkları şiirin kurulmasında. Taa o üüreder, fikiri aktarıp, onu şiir formasına, şiir kaluplarına giidirmää, incä hem duygulu laflarlan donatmaa onu. Onuştan bu Master-klaslarda büük yardım olêr o uşaklara, kimin var vergisi şiir yazmasında, ki bu uurda ustalıı ilerletsinnär, şiir yazmasında maasuz tehnikaları hem kuralları esaba alarak.
Üürenicilerin yaratmalarını incelemää deyni hem peet yazmak uurunda ustalık yolların genişliini açmaa deyni bu genç yaradıcılara poet Todur ZANET poeziya uurunda bütün ustalık yollarını açêr. Başlayıp peet kaluplarından, rifmalardan hem biçimnerdän taa söz zenginniinädän hem çeşitliinädän. Poet genç yaradıcılarlan birliktä herbir okunmuş peetä analiz yapêr hem çok nasaat verer.
Master-klasa diil salt genç poetlar katılêrlar, ama onnardan kaarä, sesleyci hem siiredici olarak, gelerlär peet yazmayan, ama literaturamızı sevän, üürencilär da. Gelerlär rusça hem moldovanca da şiir yazan üürencilär. Onnaralan Canabisi o dildä lafeder, angı dildä peet yazılı. Onuştan poeziya ustalıında bu üürencilerä dä yol açılêr. May herbir Master-klastan sora üürencilerin en islää şiirleri “Ana Sözü” gazetasının sayfalarında tiparlandılar.
Geçennerdä, Çiçek ayın 6-da, Komrat Mihail ÇAKİR pedagogika kolecında var nicä demää küçük bir yıldönümü oldu – Todur ZANET 10-cu Master-klası yaptı. Onuştan eridir açıklamaa kolecımızın istoriyasında ilk kerä olan Master-klasların günnerini:
1-ci – 2012-ci yılın Çiçek ayın 4-dü;
2-ci – 2013-cü yılın Baba Marta ayı;
3-cü – 2013-cü yılın Kırım ayın 13-çü;
4-cü – 2014-cü yılın Çiçek ayı;
5-ci – 2014-cü yılın Kasım ayın 6-sı;
6-cı – 2014-cü yılın Kırım ayın 12-si;
7-ci – 2015-ci yılın Baba Marta ayı;
8-ci – 2015-ci yılın Hederlez ayı;
9-cu – 2015-ci yılın Kırım ayın 1-ri;
10-cu – 2016-cı yılın Çiçek ayın 6-sı.
Herbir Master-klas geçti maasuz ayırılmış tematikaya görä: Ana Dili, Vatan, patriotika, sevda, aylä, aaçlık, yılların zamannarı hem başka. Master-klas şiir konkursları da yapıldı.
10-cu Master-klası uşaklar başlattılar İrina KUZNEŢOVAnın (1615 gr.) petinnän, ani maasuz bu olay için yazılmış:
Master-klas – bir büük yortu!
Master-klas – bir büük yortu!
Klasımız uşak dolu.
Hepsi hazır bu günä,
Laf ustası geler bizä.
Akademik, yazıcı,
O poet, gazetacı.
Açık ürekli insan,
Gagauzluu koruyan.
Faydalı nasaat verer,
Yol geniş açıklanêr:
Gözellää, hoş duyguya,
Angısını baaşlêêr dünnä.
“Saa ol!” – deeriz biz sizä,
Ki gelersiniz bizä.
Master-klas büün onuncu.
O bizä – bir büük yortu!
Onuncu Master-klas gösterdi, ani bu iş faydalı hem verer kolaylık üürenicilerä kendi becermeklerini ilerletmää, gösterer ani onnarın arasında var talantlı uşaklar, kim bizim literaturamızın gökündä var nicä er kaplasın. Ama bu uurda isteniler onnardan büük çalışmak hem bizdän dä, üüredicilerdän, yardım onnara.
10-cu Master-klasa katıldı 23 uşak. Şiirlerin çoyu yazılıydı ana temasına görä hem sevda için. Üürenci Georgiy SIPÇU laflarına muzika yazdı da türküsünnän şennendirdi sesleycileri. Üürencilerin yaratmalarında belli, nekadar büük sevgi anaya-bobaya, ana dilinä, milletinä, ana tarafına hem Vatanına onnarın cannarında yaşêêr. Gençlerin sevda duyguları, düşünmekleri sıkı baalı Vatanın gelecäännän, onnarın ecelinnän. Şiirlerin çoyunda öz fikiri filosofiya uurunda açıklanêr. Master-klasta okundu rus dilindä dä şiirlär.
Ne duygulu hem derin maanalı şiirlär aaçlık için! Sesleyärkän bölä şiirleri, belliydi, ani bu açıklanan duygular cannarından geçirilmiş. Yaşlarımız peydalanardı can acımasından.
O şiirlerin arasında Master-klasın öndercisi metetti İrina YABANCInın yaratmalarını.
Todur ZANET çalışmaları bu Master-klaslarda açtı üürenicilerä geniş yolu poeziyaya, cannarına ekleer büük sevgi ana dilinä, literaturaya, uyandırêr o filizleri, angıları, çiçeklär gibi açıp, meyva vererlär – o üürencilerin şiirleri. Bu buluşmaklar brakêrlar unudulmaz hem silinmäz iz uşakların cannarında, yardım ederlär başka bakışlan poeziyaya bakmaa, şiirleri duymaa, annamaa.
Master-klasta Poet kendisi dä okudu eni duumuş, yazılmış peetlerini.
Sanêrız, ani bu uşakların arasında var peetçi. Var umudum, ani onnarın da adı gagauz poeziyasında yazılacek. Bölä gençlär – Bucaan zenginnii!
Galina Dmitrievna SİRKELİ-KRİSTİOGLO, Mihail ÇAKİR pedagogika kolecın üüredicisi
Redakţiyamızdan not: Bu yılların içindä Master-klaslar uroklarını hazırlamaa deyni çok çalıştılar Mihail ÇAKİR pedagogika kolecın üüredicileri Galina Dmitrievna SİRKELİ-KRİSTİOGLO, Aleksandra Dimitrievna MARİNOVA hem Anna Danilovna SUKMAN.
