Ceviz ayın (sentäbri) 11-13 günneri arası Avdarma küüyündä olacek uşaklar arasında büük bir halklararası tenis turnirı – “Avdarma Open Cup” (Avdarmanın Açık Kuboo). Turnirda pay almaa neetlerini artık açıkladılar tenisçilär Moldovadan, Romıniyadan hem Ukraynadan.
Hepsi katılımcıların sayısı yaklaşık 100 kişiya yaklaşêr. Bunu presaya GagauzMedia portalından açıkladı “Avdarma” tenis klubun başı Elena KARAMİT. Canabisi urguladı, ani uşaklar üç yaş boyuna görä yarışaceklar: Red Court (Kırmızı kort), Orange Court (Turuncu kort), hem Green Court (Eşil kort). Yarışmalar ilk iki gün, elemä sistemasına görä, grupalarda olaceklar. Üçüncü günü da yarıfinal hem final matçları geçecek.
Hep üçüncü gündä, turnirın kapanışında, Ukraynadan profesional tenisçılar gösteri matçları oynayaceklar.
Elena KARAMİT urguladı, ani turnira katılan hepsi uşaklara sensorlu mobilnıy telefonnar baaşlanacek. Ayırıca “Avdarma Open Cup” turnirinda enseyennerä da paalı ödüllär verilecek.
“Avdarma” tenis klubun başı açıkladı, ani turnirın sponsorları – küüyün meţenatları Kazmalı kardaşları.
