Türkiyenin pravitelstvo dışında kuruluşu “Kadın Yönetici ve Kadın Çalışanlar Dayanışma Derneği – KAYÇAD” Çiçek ayın 27-28 günnerindä Türk dünnäsının karılarını “Türk dünyası kadını konuşuyor” Foruma Ankaraya topladı.
Forumda üzä yakın karı katıldı. Katılannarın arasında vardılar karılar ölä devletlerdän nicä Azerbaycan, Kazahstan, Kirgizistan, Uzbekistan, Albaniya, Bosniya hem Gerţogovina, Kosova Tatarastan (RF), KKTC, Makedoniya hem başka.
Moldovayı bu Forumda temsil etii Gagauziyanın anılmış jurnalistı hem cümne insanı Ekaterina TERZİ-BARLADÄN, Komrattan “Vesta” cümne kuruluşun hem Moldovanın üülen tarafının karılar Birliinin temsilcisi.
“Türk dünyası kadını konuşuyor” Forumunda karılar, ani kendi devletlerindä hem dünnedä kendilerini üüsek uurda gösterdilär politikada, bilimdä, mediţinada, pedagogikada, presada, cümne yaşamasında paylaştılar kendi beseriklerinnän hem, belli ki, adamnarlan bir uurda olmak için yolları aaradılar. Bundan kaarä aylä hem cümne problemalarını inceledilär.
Ekaterina TERZİ-BARLADÄN açıkladı, ani fikirlärlän hem becerikliklän paylaşmaktan kaarä, Forumda bakıldı soruş nicä karı akıntılarını kendi devletlerindä üüsek uurlara kaldırmaa, üüredicilik, kultura hem cümne uurunda ortak işbirlii yapmaa.
Nicä bildirdi Ekaterina TERZİ-BARLADÄN “Türk dünyası kadını konuşuyor” Forumu adına kendi selemnama yazısını yolladı Gagauziya Başkanı İrina VLAH.
