Moldovanın gagauz olan Baş prokuroru Aleksandr STOYANOGLUnun advokatlarının danışmasına görä, Moldova Konstituțiya sudu “Prokuratura için Zakonun 31-ci statyası” konstituțiyaya uymamasını tanıdı.
Kasım ayın 9-da Moldova Konstituțiya sudun toplantısından sora, Moldova Konstituțiya sudun artık eski başı Nikolae ROŞKA açıkladı, ani “Prokuratura için Zakonun 31-ci statyası” konstituțiyaya uymêêr”.
Aklınıza getireriz, ani bu statya görä, Moldovanın gagauz olan Baş prokuroru Aleksandr STOYANOGLUya, kendisini zakonsuz iştän alınma zamanında, verilmedi kolayık korunmaa.
Eridir urgulamaa, ani Konstituțiya sudunda bu karar alınırkan sudyalar Nikolae ROŞKA hem Lüba ŞOVA başka fikirdä kaldılar. Hep o zaman, Nikolae ROŞKA Konstituțiya sudun başından atıldı da, birkaç gündän sora, Konstituțiya sudun başı genä Domnika MANOLE ayırıldı.
Şindi, Moldova Prezidentın Maya SANDUnun Ceviz ayın (sentäbri) 26-da imzaladıı Emir, angısına görä Moldovanın gagauz olan Baş prokurorunu Aleksandr STOYANOGLUyu Baş prokurorluk işindän çıkarıldı, ortadan kaldırılsın deyni Apeläțiya Palatasında karar alacek.
Bakmayarak ona, ani Moldovada hepsi Konstituțiya sudun eski başları hem daavacıları hem da yustițiya ministruları açıklêêrlar, ani Maya SANDU lääzım bu Emiri ortadan kaldırılsın, kendisi Moldova Prezidentın deer, ani: “Konstituțiya sudun bu kararı bişey diiştirmeer”.
