Harman ayın (avgust) 28-dä Tomay küüyün klisä Kurbanıydı. Bu ayozlu yortunun kutlama çerçevesindä tomaylılar gösterdilär gagauz adetlerin kutlamasını, sıraların bakmasını hem sokaan tertipli hem kırnak olmasını.
Küüyün primarı Födor TOPÇU bildirdi, ani primariya almış karar bu yortuyu sadä bir sokakta yapmaa. Bu yıl o sokak Tomayın Sovetskaya sokaa oldu. Bütün sokaan uzunnuunda erleştirildi aullar, imeklär, tertüpli masalar hem sofralar, şarapanalarlan täskalar, içerlerin donaklıı: kilimnär, üklüklär hem palalar.
Yortunun şenniini yaptılar yaşlı insannar, angıları evelki gagauz türkülerini çaldılar, oyunnarı oynadılar, adetleri hem sıraları gösterdilär.
Kutlamanın gercii oldu “Gagauz düünü adetleri” sırası. Bu sırada insannar gösterdilär düünü taa baştan sonuna kadar: musaafirlerin (musaafirlerinin arasında vardılar Gagauziyanın hem Çadır rayonun öndercileri, Ukraynanın Dimitrovka küüyün primarı, komşu Feropontyevka küüyündän artistlär) hem saadıçların karşlamasından, gelin-güvää ballamasınadan, babuyu taligacıkta gezdimeyädän. Belli ki, düün masası da hazırlanmıştı: sarmalar, kıırmalarlan döşemelär, şişiklär, kaniskalar hem etlär, balıklar. Çalgıcılar da durmamayca çaldılar.
Gözäl bu günü tomaylılar başardılar yortulu konţertlan, angısında pay aldılar Tomay küüyündän artistlär hem oyun ansamblisi.
Fotolar – gagauzinfo.md
