2024-cü yılın Kasım ayın 21-dä Gaguziya son yoluna uurladı anılmış gagauz kompozitorunu, “Gagauziyanın kıymetli kultura zaametçisi”ni, “İncäzanaatta Maestro”sunu, “Mihail Çakir” ordenın kavalerını, türlü halklarası hem respublika ödüllerin saabisini, Gagauziyanın ofițial olmayan “Yaşa, Halkım!” gimnasının, Gagauziyada Hederlez yortusunun ofițial gimnasının – “Gagauziyada Hederlez” türküsünün, Komrat Devlet Universitetın hem Komrat kasabasının gimnalarının avtorunu, pek käämil, kıvrak, kırnak, delikat hem gülär üzlü insanı – İlya İlyiç FİLEVı (19.08.1956 – 19.11.2024).
İnsannar raametli kompozitorlan prost olsunnar hem son yoluna geçirsinnär deyni, Gagauziya kultura Upravleniyası üstünä aldı hepsi zaametleri hem çalışmaları, da yakınnarı İlya İlyiç FİLEVın ölüsünü Kasım ayın 21-dä saat 10:00-da Komrat Kulruta Evin sțenasına erleştirdi. Burada, 3 saatlık bir yaslı sırada, biri-birleri ardına Maetronun havalarını hem sıraya uygun havaları çaldılar “Düz Ava” örnekli türkü hem oyun halk ansamblisi, angısında Canabisi 3 yıl çalıştı, hem da “Elegiya” kemençecilär ansamblisi. Sandıın önündä diziliydilär Maestonun ödülleri: “Mihail Çakir” ordenı, “Gagauziyanın kıymetli kultura zaametçisi” hem “İncäzanaatta Maestro” Belgileri, türlü Diplomnar hem Gramotalar.
Sțenanın iki tarafında kurulan ekrannarda dayma gösterildi İlya İlyiçin yaratmak ömürünü kısadan annadan bir vidio.
İlya İlyiç FİLEVlan prost oldular üzlärcä insan: onun yakınnarı hem dostları, muzıkantlar hem artistlär, kultura zaametçileri hem yazıcılar, Gagauziya İspolkom azaları hem Gagauziya Halk Topluşun deputatları hem da taa çok-çok insannar, ani Moldovanın çeştli erlerindän hem başka memleketlerdän gelmiştilär. Maestroya son borcunu vereräk, maasuz taa Moskvadan geldi bizim anılmış türkücüykamız Lüdmila TUKAN.
Maestroya venoklar hem çiçeklär, candan gelän göz yaşları hem aylesinä acızgannık sözleri durmamayca akardı bu sțenada. Cannarını açıklamaa deyni, bir teklifsiz mikrofona yaklaşardılar insannar da İlya İlyiç FİLEV için kendi fikirlerini hem duygularını sölärdilär. Bunnar: “Düz Ava” ansamblnin öndercisi Tatyana ŞÇEGOLEVA, Gagauziya kultura Upravleniyasının başı Marina SEMÖNOVA, muzıkant hem kompozitor İvan LÜLENOV, akademik hem poet Todur ZANET, Komrat muzeyin direktoru Vladislav MARİNOV, “Gagauzskiye korobeyniki” ansamblisinin öndercisi Boris NOVAK, Komrat primarı Sergey ANASTASOV hem başkaları.
Tatyana ŞÇEGOLEVA urguladı “İlya İlyiç FİLEV – bu bir epohadır!”
Marina SEMÖNOVAnın “Maestro, biz seni özleyecez hem aarayacez” lafları hepsiciini yaş içinä attı.
Todur ZANET sa, okuyup kendi “KALARSAYDI – KALÊR ADIN” dörtlüünü “Dündän, büünä hem yaarına, / Geçeriz biz adım-adım. / Ömür dolêr damna-damna, / Kalarsaydı – kalêr adın.”, dedi: “Bratan, Senin adın kaldı!” da, danışıp Gagauziyanın büüklerinä, ekledi “teklif ederim İlya İlyiç FİLEVın adını temelleştirmää da onu byustunu Gagauziyanın “Şan Aleyası”nda koymaa, zerä İlya FİLEV artık bizim klasiimiz. Bundan kaarä bir şkoyaa hem bir sokaa maestronun adını vermää”.
Sıra geldiynän İlya İlyiç FİLEVın ölüsünü kaldırmaa hepsi insannar şamar düümesinnän geçirdilär onu taa yas avtobusuna koyunca hem Komradın eni mezarlıına yollanınca.
Maestro İlya İlyiç FİLEVın ölüsü Komrat mezarlıın klisesindä okundu hem bu mezarlıkta topraa verildi.
Canabisinin ölüsü kendi evindän Komrat Kulruta evinädän hem taa sora da mezarlaadan Gagauziya Başkanın duhovoy orkestrasınnan yola geçirildi.
Moldova Parlamentın deputatları da, Parlamentın Kasım 21-dä olan toplantısında, ayakta bir minut susmak duruşunnan Maestro İlya İlyiç FİLEVa saygı gösterdilär.
Gagauziya Radio hem Televideniye Cümne kompaniyası da bu yaslı sıra için kendi haberlerindä durmamayca annattı. Kolverimin birisi burada: https://grt.md/gagauziya-gun-gundan-67-yasinda-ma%c8%87stro-gecindi/
İlya İlyiç FİLEVın aylesinä hem yakınnarına, dostlarına hem yaratmak kafadarlarına, bütün gagauz halkına Canabisinin sonsuzlaa vakıtsız varması sebepinnän kendi can sancımızı hem acızgannıımızı bildireriz!
Topracıın ilin olsun, Bratan!
