Geçennerdä Moldova Respublikasının üüredicilik hem aaraştırma ministerlii yollandırdı “Moldova – üüredicilik için” programasını, angısının uuru – şkola infrastrukturaların modernizațiyası, güvenni hem komfort durumu kurmaa, hem da üüredicilik proțesına țıfralı tehnologiyalar sokmaa.
Bu üzerä Gagauziya üüredicilik Upravleniyası bir açıklama yaptı.
Bu programanın ilk etapında spisoa 35 şkola alındı, onnarın arasında Gagauziyadan sade bir – Çadır kasabasının “Mihail ÇAKİR” teoretik lițeyi. Programa genişledii zaman, ona artık 55 şkola alınacek, neredä olacek Gagauziyadan Valkaneş kasabasının “Luceafărul” teoretik lițeyi dä.
Olêr, ani Gagauziyada işleyän 45 şkoladan bu programaya sade ikisi alınêr.
Bir ek aspekt ta – bu şkolaların üüredicilik dil uuru. “Luceafărul” lițeyindä üüredicilik yapılêr sade romın dilindä, “Mihail ÇAKİR” lițeyindä sä – rusça da var, ama aarlık romın dilinä veriler (bak: https://anasozu.com/cadir-mihail-cakir-liteyinda-romin-dilina-aarlik/).
Kulturalı hem çeşitli dillär zenginnii olan tarafımızda sade iki şkolanın bu programaya alınması ortaya bir soruşu koyêr: üüredicilik uurunda devlet investițiyalarına bir uurda etişmäk prințipları. Bu türlü inițiativalar vatandaşları halizdän biri-birinä yakınnaştırması hem devlet programalarına inanç oluşturması için üüredicilik sistemasının modernizațiyası bu türlü lääzım olsun:
Bölgelerä proporțiyalı;
Dil hem kultura çeşitliini esaba alan;
Herbir üürenci için birtakım kolaylıına uurlu – bakmadaan neredä onnar üürenerlär: Kişinevda mı, Belțta mı, Yalovenda mı osa Gagauziyada mı.
Gagauziya üüredicilik Upravleniyası kendi açıklamasında urguları: üüredicilik sistemasının denkli ilerlemesi var nicä sade memleketin hepsi bölgelerinin bir uurda yardımnaması hem dooruycasına yaklaşmasınnan yapılsın.
