Serbiya devletin Zrenänin kasabasında geçän serbest güreştä U-23 Evropa Çempionatında Moldova için güreşän Gagauziyanın Kıpçak küüyündän duumalı güreşçimiz Aleksandr GAYDARLI, 70 kg kategoriyasında, Evropa çempionu oldu.
Baba Marta ayın 10-da Aleksandr GAYDARLI, finalda Rusiyadan güreşçiyi Magomet-Emi ELTEMİROVu 3:2 enseyip, Moldova için altın medaliyi kazandı hem Evropa çempionu oldu.
Bu parlak altın medaliya hem çempionnaa yolunda Aleksandr GAYDARLI hepsi konkurentlarını amansız ensedi: Gruziyayı 10:0, Azerbaycanı 11:0 hem Ukraynayı 10:0.
Kutlêêrız Moldovayı, kutlêêrız Gagauziyayı, kutlêêrız Aleksandr GAYDARLIyı hem onu bu başarıya hazırlayan Rusiyanın kıymetli trenerını Stanislav Födoroviç RAMONOVu hem dä Moldovanın kıymetli trenerını Pötr VLAH, angısının kanadı altında örüyer serbest güreştä Evropa çempionu Aleksandr GAYDARLI.
Şindi sırada Arnautluun baş kasabasında Tiranada Çiçek ayın 20-26 günnerindä olacek büüklär arasında serbest güreştä Evropa çempionatı, angısına putövkayı Aleksandr GAYDARLI kazandı bu yıl Küçük ayında Moldovanın çempionu olup.
