Slovakiyanın Snin kasabasında kadetlar arasında serbest güreştä dünnä çempionatının beşinci günü gidärdi. O günü Moldova komandasının sportsmenı, “Vekil” güreş klubun güreşçisi Nikolay GRAHMEZ bronza medalisini kazandı. Nikolay GRAHMEZ bu çempionatta tarattı sade bir kerä.
“İlk güreştä ensedim Egipettän sportsmenı.- annadêr Nikolay GRAHMEZ.- Sora 14:4 ensedim belarusu. ½ finalda Amerikadan sportsmena tarattım. Bronzayı da aldım, enseyip Vengriyadan güreşçiyi. Bu ensiyeşimi Vatanıma baaşlêêrım!”
Açan Kongaz “Vekil” güreş klubun güreşçisi Nikolay GRAHMEZ döndü evä Slovakiyadan, onu küü kenarında karşladılar anası-bobası, dostları, trenerlar hem başka güreşçilär. Belli ki, patladıldı şampanskiy da, taazä dünnä prizörunu, baştan-aşaadan şampanskiydä yıkadılar. Unudulmadı medali da.
Annadarkana nicä bronzayı kazandı, Nikolay unutmadı şükür etmää kendi trenerlarına da: Genadiy TULBAya hem Vladimir GOTİŞANa.
Nikolay GRAHMEZ 15 yaşında. Duudu hem üürener Kongazda. 10 yaşından beeri “Vekil” güreş klubunda serbest güreş sekţiyasında trenirovka yapêr. Pay aldı Moldova çempionatlarında. 2012-ci yılda Ankarada “Bütündünnä uşakların Olimpiadasında” çempion oldu.
Not. “Vekil” güreş klubun öndercileri açıkladılar, ani danışêrlar cümne insannara toplamaa para, baaşlamaa deyni o parayı kadetlar arasında serbest güreştä dünnä çempionatının prizörüna Nikolay GRAHMEZä.
Anaktar sözlär : Nikolay GRAHMEZ, Николай Грахмез
