Ceviz ayın (sentäbri) 18-dä, Gagauziya kultura hem Gagauziya üüredicilik Upravleniyaların zaametinnän, Komrat Kultura Evindä oldu dev gibi büük bir prezentațiya gagauz literatura istoriyasında seftä çıkan gagauzça “Mamucuumnan kol-kola” hem romınca „Cu măicuţa de mânuţă” uşaklar için peet-boyama kiyadına.
Poet Todur ZANETin gözäl, kırnak hem tertipli hazırlanan hem dä düzennenän “Mamucuumnan kol-kola” uşaklar için peet-boyama kiyadı – bu bir kiyadın içindä iki kiyat olan hem valet kalubuna erleştirän bir yaratma, angısını romın dilinä çevirdi moldovan poetı Titus ŞTİRBU hem gözäl resimnedi gagauz resimcisi Mihail ARABACI.
Bu meraklı kiyatlan tanışmaa deyni, o günü Komrat Kultura Evinä geldilär uşak başçalarından hem şkolalardan uşaklar kendi terbiedicilerinnän hem üüredicilerinnän, Gagauziya kultura hem Gagauziya üüredicilik Upravleniyaların başları hem zaametçileri, filologlar hem yazıcılar, resimcilär, bibliotekacılar, incäzanaat hem kultura insannarı.
Kiyatlan tanışmanın ofițial bölümü başlamayınca, zalda maasuz kurulan masacıklarda uşaklar artık büük havezlän siiredärdilär hem boyardılar kiyattan resimneri.
“Mamucuumnan kol-kola” uşaklar için peet-boyama kiyadın prezentațiyası başladı ondan, ani Çadır kasabasının Dionis TANASOGLU adına gagauz milli teatrusu gösterdi uşaklara “Onadan saymaa bilän keçicik” masalını.
Prezentațiyanın başlangıcında söz verildi Gagauziya kultura Upravleniyasının başına Marina SEMENOVAya, angısı annattı Gagauziyada aslıya çıkarılan kultura, bilim hem üüredicilik uurunda kiyat basmak proektları için. Canabisi urguladı, ani “bunnar yapılêr “Gagauz dilinin kullanmak sferasının genişledilmesi için” Zakonun ömürä geçirilmesi çerçevesindä hem hepsi o tiparlanan kiyatların bir uuru var – ana dilimizi korumaa, ilerletmää hem zenginneştirmää. Neyi da onnar yapêrlar”.
Marina SEMENOVA açıkladı nicä fikir geldi “Mamucuumnan kol-kola” uşaklar için peet-boyama kiyadını üzä çıkarmaa hem şükür etti kiyadın avtoruna hem onu hazırlayannara bu bereketli çalışmaları için.
Prezentațiyada nasaat edän Gagauziya üüredicilik Upravleniyanın başı Natalya KRİSTEVA, şükür ederäk bu kiyadı hazırlayannara hem tiparlayannara, urguladı, ani ““Mamucuumnan kol-kola” kiyadı vakıdında çıktı, çünkü bu gibi kiyatlara büük kıtlık var hem bu türlü kiyatlar pek lääzım, zerä şkolaların başlangıç klaslarında hem uşak başçalarında üüredicilär hem terbiedicilär büük zorluk çekerlär gagauz dilindä urokları bu uurda hazırlamakta”.
Komrat Kultura Evinä gelän insannarın önündä söz tuttu kiyadın resimcisi Mihail ARABACI, angısı annattı kiyadın üzerindä resimneri hazırlamak çalışmalar için.
Kendi sözündä Komrat 9-cu uşak başçanın gagauz dilindä üürediciyka-terbiediciykası Lüdmila BARLADÄN urguladı, ani bu kiyat hem uygun, hem lääzımnı hem da metodika kiyadı olarak kulanabilinir.
Komrat Gavril GAYDARCI adına teoretik lițeyin romın dilindä hem literaturasında üürediciykası Kristina KAMBUR, gözäl romınca lafederäk, şükür etti kiyadın avtoruna hem yaratmaları gagauz dilindän romın dilinä çevirän poeta Titus ŞTİRBUya bölä kıvrak, uşak aklına kolay yatan peetlär için hem umut etti, ani ileri dooru da gagauzça hem romınca kiyatlar Gagauziya uşaklarına deyni dünneyä taa geleceklär.
Prezentațiyanın sedefi oldu o, açan sțenaya çıktılar kiyadın haliz okuycuları hem gelecektä mutlak resimcileri – Komrat “Süütçääz” uşak başçasından uşaklar Aleksandr GAYDARCI, Vika PATRAMAN, Nastä PATRAMAN, Polina BARBOVA, Eva KONSTANTİNOVA (terbiedicileri – Eva POPOVA hem Aleksandra GAYDARCI) hem Komrat Dimitriy KARAÇOBAN adına teoretik lițeyindän üürencilär Mihail GARGALIK, İvan TODOROV, Yuliya KENDİGELÄN, Miroslava KARADJOVA, Yaroslav SAKALI, Tamara ÇEBAN, Natalya ARABACI (üüredici – Tatyana Stepanovna KİRYAKOVA), angıları büük duyguylan hem meraklan iki dildä, hem gagauzça hem da romınca, annatılar “Mamucuumnan kol-kola” kiyatçıından peetleri. Ne iş için kiyadın avtoru baașladı onnara hepsinä taazä kiyatçıı.
Prezentațiyanın sonunda kiyadın avtoru akademik, yazıcı, poet, folklorcu, dramaturg Todur ZANET, annatı kiyadın hazırlanması hem düzennemesi için hem, başta Gagauziya kultura Upravleniyasının başı Marina SEMENOVA olarak, şükür etti hepsi insannara kim karar aldı bu kiyatçıı çıkarmaa hem hepsinä onnara, kim saymadı zaametini da ölä gözäl prezentațiyayı hazırlanmasında pay aldılar.
Hepsinä, kim bu gözäl yortuda pay aldı, baaşlandı birär kiyatçık ta.
“Mamucuumnan kol-kola” („Cu măicuţa de mânuţă”) uşaklar için peet-boyama kiyadın prezentațiyasından sora, taa suumayan zalda, Gagauziya Radio hem Televideniyeylan (GRT) cümne Kompaniyasının zaametçileri Polina BARBOVA (götürücü) hem Sergey GERGİEV (operator) kiyadın avtorunnan “Gagauziya gün-gündän” programasını hazırladılar da sora onu GRT kanalında Cümneyä yayınnadılar: https://grt.md/gagauziya-gun-gundan-mamucuumnan-kol-kola-kiyadin-prezentatiyasi/.
