Yarım yıl yuurup Gagauziya Halk Topluşunu hem son-sonunda kendisinin 18 kişisinä “Gagauziyanın 2021-ci yılı için Büceti” Zakonunu kablettirän İrina VLAH, şindi da deer, ani “Halka karşı” bicetı kablidelmesindä kendisindä kabaat yok, ama kabaat Gagauziya Halk Topluşunun, ani kabletti bu bücetı.
En aazdan bunu Canabisini sölemiş Svetloe küüyün küü sovetniklerinnän buluşmada, açan, neredä sä, emir vermiş, ani küüyün bücetını kabledilän “Gagauziyanın 2021-ci yılı için Büceti” Zakonuna görä diiştirsinnär.
Açan Svetloye küüyün yaşlıları başlamışlar üfkelenmä bu yapılan işä, Gagauziya Başkanı sade onda olan ținizmaylan demiş, ani onun başkannıı altında bulunan İspolkomda kabaat yok, zerä o bu Bücetı kabletmedi, ama kabletti Gagauziya Halk Topluşu, unudup urgulamaa, ani diil Halk Topluşu, ama GHTnın o 18 deputatı, ani soțialist sayılêrlar hem herkerä Başkanın ipinnän kolverilerlär da ellerini kaldırêrlar sade ozaman, açan o ellerä baalı olan ipleri İrina VLAH çeker.
Sovetniklerin önnerindä sä, Gagauziya Başkanı, maska altından yapılarak, “tüflanêr”, ani şindi onnar, zavalılar, lääzımmış bu “Halka karşı” bücetı paetsinnär.
