Koronaviruslan ilgili olarak kurulan Üstolan durumunun beterinä Moldovada, sansın ot biçimindä, kuvetlär kendi vatandaşlarına hem juridika kuruluşlarına bir amansız, ama seçmeli, büük ştraflar koymaa başladılar. Juridika kuruluşlarına: 50 bin ley – 75 bin ley arası; kuvettä olmayan sıradan vatandaşlara: 22,5 bin ley – 25,0 bin ley arası; kuvettä olannara hem “halk izmetçilerinä”: 0,00 ley – 300 ley arası.
Ştrafların sebepi – “epidemiyalı hastalıklarından korunmak için profilaktika sıralarına bakmamak”.
Bu sebep ta büük şüpä altında, çünkü Moldovada epidemiya yok. Dünneydä bilä epidemiya yok! (Epidemiya olması için lääzım bütün insannarın 5% birdän hastalansın!!!). Sade var bir uydurma pandemiya, angısını da zakonsuz bildirdilär, zerä Bütündünnää saalıı koruma Kuruluşu (angl.: World Health Organization, WHO) pandemiyayı bildirmää kararını lääzımdı kendi Genel toplantısında alsın. Ama bölä bir toplantı yapılmadı. Bu kuruluşun Baş direktoru efiopiyalı Tedros Adhanom GEBREYESUS kendiliindän dünneyä pandemiya açıkladı. Esap ta lääzım olacek ondan sorulsun.
Söz gelişi, Amerika Birleşik Devletleri (ABD) artık sordu bunu. 14.04.2020 günü ABD Prezidentı Donald TRAMP (angl.: Trump) Bütündünnää saalıı koruma Kuruluşuna, pandemiyaylan ilgili yalannar için, cezasını kesti: WHOya ABD tarafından yılda 400 milion ABD dolarından zeedä verilän para yardımını durguttu.
Dönelim Moldovadakı zakonsuz ştraflara. Zakonsuz, zerä şindi artık Moldova sudları, o ştrafların zakonsuz olduunu urgulayıp, onnarı silerlär (bak: https://www.zdg.md/ru/?p=37841).
Ama, buna bakmadaan, Moldova Prezidentından taa içişleri ministerliin izmetçilerinädän hepsi üünerlär, ani artık 36 milion leylik ştraflara protokollar yapılmış. Bu ştrafların yaklaşık 0,5 milion leyi sade Gagauziyada. Prezident İgor DODON son açıklamaların birisindä dedi, ani “ileri dooru da, Üstolan durumnan ilgili olarak, seslämeyän vatandaşlara, ştraflar koyulacek”.
“Ama kimä koyulacek?” – soralım. Zavalı fıkaarä insannara mı, son soluunu soluyan ufak hem orta biznesa mı, osa hepsinä sıradan mı?
Onnar deerlär: “Hepsinä sıradan!” da bizi yalandırêrlar hem aldadêrlar. Bu konuylan ilgili “epidemiyalı hastalıklarından korunmak için profilaktika sıralarına bakmamak” sebepinnän koyulan hem koyulmayan ştraflardan beş örnek:
Birincisi – 02.04.2020 Kişinevda park içindän geçän genç bir ayleyä (karı-koca hem uşak) 45 bin ley ştraf koyuldu.
İkincisi – 25.04.2020 günü Yaloven rayonun Mileştii Mici küüyün primarına 300 ley ştraf koyuldu (zakona görä lääzımdı koyulsun 50 bin ley – 75 bin ley arası ştraf ).
Üçüncüsü – 03.04.2020 günü Gagauziyanın Çadır kasabasının potrebkooperațiya tükännarına (saabisi rametli Zahar KİHAYAL) 75 bin ley ştraf koyuldu.
Dördüncüsü: 03.05.2020 günü Kişinevun merkezindä bulunan gostinițaya hem onun restoranına, neredä buluştular Moldova Demokratlar partiyasının öndercileri hem Moldova Prezidentın adamı (bak: deschide.md ) bişeycik ştraf koyulmadı (lääzımdı koyulsun 50 bin ley – 75 bin ley arası ştraf ).
Beşincisi: Moldova Prezidentı kendi adamnarınnan, bütün respublikada, epidemiyalı hastalıklarından korunmak için profilaktika sıralarına uymadaan, durmamyca gezer, insannarlan buluşêr, ama onnara 0,00 ley ştraf koyulêr.
Başka lafımız yok: Akıllı annayacek, ahmaa – hiç diil lääzım da!
Vladimir KALECİ
KORONAVİRUS GÜNÜ FIKRASI:
ABD, Büük Britaniya, Germaniya devletlerin öndercileri: “Paalı vatandaşlarımız, evdä durun!” Vatandaşlar: “Nicä ölä?! Neylän yaşayacez?!” Öndercilär: “Evdä durun, nayın sizä para!”
Moldova devletin öndercileri: “Evdä durun!” Vatandaşlar: “Nicä ölä?! Neylän yaşayacez?!” Öndercilär: “Evdä durun, te sizä ştraflar!”
