Çeşmä küüyün soțialistlar partiyasının sovetnikleri, taa sora da soțialistlar partiyasından Gagauziya Başkanın saytında peydalandı bir yalancı haber, ani Çeşmä küüyün primarını Sofiya JEKOVAyı iştän atêrlar ö üzerä, ki Canabisi kocasının maşinasını primariyaya kiraya almış.
Nicä bildirdi küülülerinä danışmada kendisi Sofiya JEKOVA bu maşinayı kiralamaa deyni bire-bir oylan karar alınmış küüyün Sovetindä. Sofiya JEKOVAnın açıklamasına görä bunun için ellerini kaldırmışlar, büün yalan yazan, Çeşmä küüyün soțialistlar partiyasının sovetnikleri da (bak: https://www.youtube.com/watch?v=Q3TpYZmwHgE&t=7s).
Sofiya JEKOVA söledi, ani tarafımızda diil seftä kullanılêr bu yalancılık mehanizması, açan Gagauziyada büünkü kuvedinä uygun olmayan primarların, buazlarına basıp, onnarı işindän atmaa savaşêrlar onnar, kimi insan hiç ayırmadı da.
Ya getirin aklınıza: bölä savaştılar yapmaa Dizginca primarına Vasiliy KAPSAMUNa, Kıpçak küüyün primarına Oleg GARİZANa, Kiriyet küüyün primarına Valentina KAYKIya, Valkaneş primarına Viktor PETRİOGLUya. Da sora sud karar aldı, ani bu insannar kabaatlı diil.
Şindi da Çeşmä küüyün primarı Sofiya JEKOVA, dooruluu aaramaa hem yalancıları dillerini kesmäk için danıştı suda. Şüpeniz olmasın – sud şindi da Sofiya JEKOVAnın kabaatsızlıını ortaya çıkaracek.
Sofiya JEKOVA Çeşmä küüyün primarı seçildii gündän beeri, bu küüdä islää işlär hızlı örümää başladılar: Uşaklar yaratmak evin kurulmasından taa 1000-dän zeedä pensiyacılar parasız ekmek daatmaydan (bak: http://anasozu.com/ankara-golbasi-primariyasindan-cesma-kuuyuna-kardas-yardimi/), COVİD hastalarına parasız ilaç vermesindän taa küüyün boklukları problemasının çözmesinädän hem taa çok işlerädän.
Ama bu gözäl işlär buazlara basannarın hiç umurlarında da diil, zerä geler Halk Topluşuna seçimnär da onnar orayı Gagauzlara karşı gidenneri hem Gagauzluun buazına basannarı getirmää savaşêrlar.
Akademik hem poet Todur ZANET, Gagauz Millli Gimnanın avtoru
Baş patret: “Holop” kinosundan.
