Aydınnadıcımızın Protoierey Ay-Boba Mihail ÇAKİRin (27.04. 1961– 08.09.1938) duuma gününün 160-cı yıldönümünä karşı, Gagauziyanın üüredicilik Upravleniyası kanadı altında, Gagauziya şkolalarında altında geçerlär “Ana dilim – tatlı bal!” temasına görä açık uroklar.
Çiçek ayın 15-dä Baurçu küüyün gimnaziyasının 9-cu klasında oldu ölä bir urok “Ana tarafım, paalı topraam gagauz yazıcıların yaratmalarında” temasına görä, ani ilgiliydi kurikulumun kaluplarınnan. Temel olarak, bu urokta annadıldı Protoierey Ay-Boba Mihail ÇAKİRin gagauz milletinä yaptıı izmetlär. Bundan kaarä siiredildi prezentațiyalar, ani açıklardılar Ana tarafına sevda hem kendi gagauz milletinä saygı duygularını. Bunun için kullanıldı türlü metodlar hem uygunnuklar, angıları verdi kolayını üürencilär, üüdüp bu konuları, verilän bilgilerä analiz yapsınnar, ana tarafın gözelliinä yaratma aşırı derin dalsınnar hem kendi düşünmeklerini fikirli sıraylan gagauz dilindä annatsınnar.
Başka bir açık urok geçti Çiçek ayın 19-da Kırlannar (Kotovskoe) küüyün İlya SINKU adına gimnaziyasında. O uroon temasıydı – “Halkın zenginnii – onun dili”. Urok oldu 1-ci klasta hem götürdü onu üürediciyka Mariya Dimitriyevna TELPİZ. Üürencilär küçük yaşta oldukları için, bu urok oyun, türkü hem peet biçimindä geçti. Belliki, eni tehnologiyalar hem metodlar da bir tarafta kalmadılar – urokta interaktiv taftası kullandı. Maasuz bu urok için gimnaziyanın 6-cı klastan üürencilär da gösterdilär kendi küçük kolegalarına gagauz dilinä çevirilmiş rus masalını “Nacaktan manca”.
Hep bu temalarlan ilgili taa bir açık urok oldu Çiçek ayın 21-dä Kongaz küüyün Nikolay ÇEBANOV adına gimnaziyasında, neredä 4-cü klasın üürencileri annattılar bizim zengin hem şıralı gagauz dilimizdä peet, çaldılar türkü, oynadılar gagauz oyunnarını hem rus masalını “Trupçaz” gagauzça gösterdilär. Hazırladılar bu uroo üürediciykalar Matröna Dimitrievna KÖR hem Alla Petrovna TERZI, angıları becerdilär yapmaa ölä, ki üürencilär annasınnar, ani lӓӓzım korumaa hem ilerletmää Ana dilimizi – Gagauz dilimizi, nicӓ korumuşlar hem ilerletmişlär onu dedelerimiz.
“Ana dilim – tatlı bal!” temasına görä Çiçek ayın 22-dä yapıldı açık urok Avdarma küüyün Dimitriy ÇELENGİR adına teoretik liṭeyindӓ dä, angısını geçirdi gagauz dilindä hem literaturasında üürediciyka Mariya İvanovna MARINOVA, verip uşaklara, ana temadan kaarä, söz temasını – “Mihail ÇAKİR – gagauzların aydınnadıcısı”.
Uroon baş temasıydı “Ana dilim – tatlı bal!” (üürenilmiş materiala tekrarlamak), ama haliz özüydü o, ani üürediciyka becermişti büük bir enilik ortaya sürmää – “160 laf gagauzça!” adlı virtual trenin vagonnarına erleşip, üürencilär yollandılar bilgi yoluna, tanışmaa deyni Ay-Boba Mihail ÇAKİRin yaşamasının hem yaratmasının ömür sayfalarınnan, ani ilgiliydilär aydınnadıcımıcın 160-cı yıldönümünnän.
Urok vakıdında virtual tren durgunardı stanṭiyalarda, neredӓ esaba alınırdı “Adlık”, “Nışannık”, “İşlik” temaları hem, meraklık için, işä katılırdı söleyişlӓr, peetlär, türkülӓr. Üürnmiş materiallara görä tekrarlamayı başarıp, herbir stanṭiyada üürencilӓr kabledӓrdilӓr eni bilgilär hem açıklamaklar Ay-Boba Mihail ÇAKİR için, onun çalışmaları hem gagauz dilinnän hem da yazısınnan baalatısı için.
Not. Material hazırlandı Gagauziyanın üüredicilik Upravleniyasının açıklamalarına görä.
PATRETLERDÄ:
Baurçu küüyün gimnaziyasının 9-cu klasında “Ana tarafım, paalı topraam gagauz yazıcıların yaratmalarında” açık urok:
Kırlannar (Kotovskoe) küüyün İlya SINKU adına gimnaziyasında “Halkın zenginnii – onun dili” açık urok:
Kongaz küüyün Nikolay ÇEBANOV adına gimnaziyasında açık urok:
Avdarma küüyün Dimitriy ÇELENGİR adına teoretik liṭeyindӓ “Mihail ÇAKİR – gagauzların aydınnadıcısı” açık urok:
Patretlär – guogagauzii.md
