Ceviz ayın (sentäbri) ayın 30-da Başküüyü (Kirsova) küüyündä, Gagauziya kultura Upravleniyasının çalışmalarınnan, geçti pek meraklı bir sıra: «КУЛЬТУРНОЕ НАСЛЕДИЕ: история и современность» (“KULTURA VARLII: istoriya hem büünkü zaman” – çeviri “Ana Sözü”) Bilim-praktika konferențiyası, angısını denk geldi Başküüyü (Kirsova) küüyün iki kultura merkezinin – küüyün istoriyası muzeyi hem “Ana-Boba evi” muzey evi – yıldönümnerinä.
Bakarak muzeylärlän ilgili bıldırkı Bilim-praktika konferențiyasına, bu yılkı “KULTURA VARLII: istoriya hem büünkü zaman” Bilim-praktika konferențiyasında pay aldılar Moldovadan hem Gagauziyadan muzeycilär hem muzeylärlän arhivlar işçileri, aaraştırmacılar, bilim-akademik zaametçileri, bibliotekacılar, adetlerimizlän türkülerimizi koruyan türkücülär hem ansamblilär, başka kultura insannarı.
Bilim-praktika konferențiyasının açılışını yaparak, Gagauziya kultura Upravleniyasının başı Marina SEMÖNOVA dedi: “Gagauzlarda var bir derin fikirli söleyiş: “Açan kök kaavi – dallar da örüyer”. Dallar – o kuruluşlar, angıları yardımcı olêr korumaa, ilerletmää hem toplamaa gelän evlatboylarına: koraflı kilimneri, dokuma peşkirleri, halk rubalarını, avadannıkları. O zenginnikleri, ani yıl-yıldan incelenerlär hem korunêrlar muzeylerin izmetçileri tarafından”.
Üç dildä – gagauzça, romınca hem rusça – geçän hem gagauz halkın kultura varlıının korulanmasına, incelenmesinä hem tanıtmasına adanan Bilim-praktika konferențiyanın çalışması pek genişti. Onun programasında oldu iki diskusiya paneli, muzeycilerin master-klasları, interaktiv görüşmelär hem gagauz halkın adetlerinnän ilgili eni kiyatlarlan tanışmak.
I-ci diskusiya paneli: «Роль музеев в сохранении и продвижении культурного наследия и развитии национальной идентичности» (“Kultura varlıın korunmasında hem milli kimnik geliştirilmesinin tanıdılmasında muzeylerin rolü” – çeviri “Ana Sözü”).
Panelin moderatoru – Anna RUSSU, Gagauziya kultura Upravleniyasının kultura kuruluşların çalışmalarının monitoring hem analiz Servicin başı.
Panelin spikerleri:
Mariya KAPAKLI, Beşalma küüyün Dimitri KARAÇOBAN adına istoriya hem etnografiya muzeyin muzeografı;
Natalya MUTAF, V. A. Derkaç adına istoriya hem tarafı aaraştırma muzeyin direktoru;
Sofya PANÇEVA, Ütülü küüyün istoriya hem tarafı aaraştırma muzeyin direktoru;
Petru VİKOL, Moldova Respublikasının Etnografiya hem dolaylı tabiat istoriyası Milli muzeyin direktoru.
II-ci diskusiya paneli: «Музей как образовательная платформа: передача памяти будущим поколения» (“Muzey bir üüredicilik platforması olarak: gelän evlatboylarına akılı aktarmak” – çeviri “Ana Sözü”).
Panelin moderatoru – Anna RUSSU, Gagauziya kultura Upravleniyasının kultura kuruluşların çalışmalarının monitoring hem analiz Servicin başı.
Panelin spikerleri:
Olga TRANDAFİLOVA, Avdarma küüyün istoriya muzeyin direktoru;
Anna ZADIR, Başküüyü (Kirsova) M. Tuzlov adına lițeyin üüredicilik bölümün başı, istoriyada hem cümne terbiedilmesindä üürediciyka;
Evgeniya LÜLENOVA, Gagauziyanın Pötr DRAGANOV adına Merkez bibliotakasının baş bibliotekacıykası;
Kristina GODOROJA, Moldovanın Material olmayan kultura varlıın korunması hem tanıtması Milli merkezin Folklor arhivının başı;
Tatyana KONDRATOVA, Kongaz küüyün Süleyman DEMİREL Moldo-türk teoretik liţeyin 12-ci klasta üürenciykası, liţey dumasının başı.
Bilim-praktika konferențiyasında insannarı tanıştırdılar Çeşmäküyün istoriya hem etnografiya muzeyin hazırladıı iki kiyatlan: “Masallar gibi gelir, ama masal diildir… Çeşmä küüyün düün adetleri” hem “Tarladan sofrayadan ekmään uzun yolu. Ekmek – dünneyin temeli”.
Konferențiya sırasında Gagauziyanın folklor ansamblileri adetlärlän ilgili sıraları gösterdilär hem gagauz halk türkülerini çaldılar.
