Gagauziyanın üüredicilik upravleniyasının tarafından açıldıı çok dillerin ilerletmesinä hem populärizațiya marafonunu aslıya çıkarmak için, uşak başçasının zaametçilerin teklifinä görä, 2025-ci yılın Büük ayın (yanvar) 22-dä Komrat №6 “Gülüş” uşak başçasında oldu bir buluşma sırası büük gagauz yazıcısınnan, akademiklän, türkologlan, folklorcuylan Todur ZANETlän
Buluşma sırasında hazırlanmak grupalardan uşaklar annatılar Todur ZANETin “Böcecik” kiyadından peetleri hem çaldılar onun laflarına türküleri.
Bundan kaarä, folklorcunun topladıı şakalı gagauz cümbüşlerinä görä, büük grupalardan uşaklar, gözäl hem şakalı teatru insțenirovkaları yaptılar.
Ayırıca bu sıraya buyur edilän muzıkacı İvan JELEZNIY, kendi oolunnan Arseniylän, gagauz “Oglan” halk türküsünü çaldılar.
Hazırladılar bu yortulu sırayı uşak başçasının gagauz dilindä üürediciyka-terbiediciykalar Anna Vasileyvna PAVALATİ hem Anna Födorovna GRİÇENÜK, hem da uşak başçasının direktoru yardımcısı Ekaterina Vladimirovna LEYÇU olarak.